Partidonan ta prepara lista di candidato cu despues ta independiente
*Husticia ta detene acusadonan Avestruz y Benny ta den Parlamento
*Gobernantenan cu a destrui Aruba ayera mester dicidi awe pa futuro
ORANJESTAD (AAN) — Na momento cu ayera Aruba tabata prepara pa tuma nota di kende ta presenta nan mes como candidato pa Parlamento, DIARIO a traha un inventario di realidad di nos sistema democratico.
Loke ta pasa actualmente lo mester ta chistoso si no ta asina, cu e berdad ta sumamente tristo.
E gobernacion di 2009-2017 a laga un saldo di desaster pa Aruba, cu na prome luga a perde su autonomia for di momento cu na 2014 Reino a pone Aruba bou supervision pasobra gobierno Mike Eman a crea un caos financiero y Aruba casi tabata sink.
Pero tabata tin mucho mas. Cu un ola di mentira, Aruba a wordo prepara dor di Gobierno Eman pa un futuro den cual economia lo a crece cu 15 porciento cu yudansa di Nicolas Maduro, cu ta goberna e economia morto di Venezuela.
A base di e proyecto Citgo, un recuperacion economia pa Aruba a tranca for di 2016 cu Citgo a tene Aruba rehen.
Hopi negoshi y persona cu a haci debe pasobra ta futuro di cinco strea tabata habri pa Aruba, a keda den problema serio ora no solamente Citgo no a bini, pero debe nacional y proyectonan PPS a subi belasting cu e Arubiano mester a paga.
Pero desaster financiero no tabata e unico problema.
Husticia a haya su mes den overdrive na momento cu investigacionnan a cuminsa riba diferente tereno.
E forma cu a gasta placa y cu a bay contra Ley di Contabilidad a keda den background sin hata atencion mescos cu e forma cu a atrae Citgo y firma acuerdonan importante cu Venezuela, sin permiti Parlamento sikiera mira kico e acuerdo tabata bisa.
Pero den e monton di desaster riba desaster, un detaye por bay perdi.
Na 2017 Pueblo a cansa y a cambia e rumbo di dos eleccion mientras ya tabata tin caso di Paul y permiso.
Na 2017 e Ministronan di Gobierno Eman a bira miembro di Parlamento cu excepcion di Mike Eman mes, cu a bisa cu e ta retira di politica pero ainda ta den contienda.
Den Parlamento e ex Ministronan di Gobierno Eman a haya oportunidad di defende loke nan a haci como Ministro.
E problema ta cuminsa ora Benny Sevinger ainda ta den Parlamento mientras e ta bou investigacion y manera e mes a bisa por wordo deteni cualkier momento.
Hunto cu Benny Sevinger awor ta bini dilanti Richard Arends den e caso di Refineria di Aruba cu ta rabo di Citgo.
Esaki ta haci cu personanan cu no solamente a destrui e ayera di Aruba pero tambe ta wordo menciona den scandal cu a alcansa husticia, ta miembro di Parlamento.
Un parti interesante ta cu awe tur candidato ta drenta na man di partido politico. Si algo bay robes of nan no haya loke nan kier, nan por bandona partido y keda den Parlamento sin partido.
Nos ta en espera di nos candidatonan pa proximo eleccion. Pero tin pregunta cu nos ta haci nos mes riba nos sistema politico, cu sigur mester cera buraconan importante!
