Prome Minister Evelyn Wever-Croes:
ORANJESTAD (AAN): Otro siman diabierna dia 6 di december nos pais ta bayendo urnanan electoral, pa scoge nos parlamentarionan nobo, y asina haya un gobierno nobo pa e periodo di 2025 pa 2029. Prome Minister diahuebs anochi, den un discurso dirigi na henter pueblo di Aruba, a duna un resumen di e maneho financiero responsabel di Gabinete Wever-Croes despues di varios reto encontra y e reto di pandemia.
Prome Minister a enfatisa cu den e añanan nos dilanti, pais Aruba mester sigui mantene su mes na e disciplina financiero aki, pasobra sin finansas, no por haci mucho. No ta tempo pa purba score “bulando cu hala di manteca” pasobra lo causa e pueblo di Aruba hopi daño.
Den e ultimo dianan aki prome cu eleccion dia 6 di december benidero, politiconan di oposicion a haci varios promesa entre otro pa elimina un cantidad di impuesto y aumento di un cantidad di entrada. Prome Minister a enfatisa cu esakinan ta promesanan no realistico, y si nan wordo ehecuta manera nan ta wordo bisa, mas bien ta compromete Aruba cu debenan nobo y presion financiero nobo. Mester tene cuenta cu esaki por aumenta inflacion na Aruba y perhudica e stabilidad financiero cu Aruba ta logrando.
Prome Minister a enfatisa cu gobernacion ta algo serio. Aruba ta saliendo for di dos crisis cu a devasta nos pais financieramente durante ultimo añanan. Esun prome ta di e crisis financierio cu Gabinete Wever-Croes a hereda na 2017 di e gobierno anterior. Esaki a resulta den un KB di Hulanda cu ex prome minister Mike Eman a haya pa su mal gobernacion.
Despues a sigui e Crisis di Pandemia cu a causa un crisis di Salud y uno Financiero Economico pareu. Ta awor apensas Aruba a cuminsa paga.
“Awe Aruba ta riba caminda di progreso y recuperacion, pero nos pais ainda ta VULNERABEL. Aruba tin un debe nacional di mas di 5 biyon florin ainda cual tur aña nos mester paga y riba dj’e, pagando mas di 300 miyon florin na interes. Ta cu un maneho responsabel, prudente y strategico nos ta pagando riba e debe, invertiendo den prioridadnan urgente y dunando bek loke nos por na comunidad, pues den un forma responsabel”, Prome Minister a remarca.
Prome Minister a expresa cu Gobierno ta desea di por a haci mas, Sinembargo “Bo no por fia pa bo duna”, pasobra esey ta bay contra normanan financiero, y pasobra despues loke bo a duna bo tin cu paga bek y cu interes. Esey no ta sostenibel, bo lo agota bo recursonan y BBO lo tin cu subi hopi; esaki lo significa cu costo di bida y inflacion tambe lo subi.
“P’esey mi ta ripiti, Gobernacion ta algo serio, no ta cuestion di purba score ‘bulando cu hala di manteca’, pasobra bo ta causa bo mes y e pueblo di Aruba daño. Tin ehempel suficiente di paisnan Europeo y di Sur America cu a bay haci esaki y nan fondonan entre otro di pensioen a kibra y a perhudica henter e pais.
Loke si nos Gobernacion a haci y ta haciendo ta mehora e capacidad financiero di Aruba pa por inverti y pa duna alivio, pa mehora e calidad di bida di nos ciudadanonan den forma directo y indirecto”, Prome Minister a duna di conoce.
