Go-Fast cu como 1.000 kilo di cocaina intercepta cerca di Curaçao

ORANJESTAD (AAN): Tabata Diahuebs mainta, cu Guardacosta di Caribe Hulandes a detecta riba radar, cu un boto sospechoso ta moviendo den area di Curaçao.

   Mesora a laga e Helicopter di Guardacosta lanta vuelo pa bay den e area.  E Helicopter a bin descubri un Speedboat tipo Go-Fast moviendo riba lama.  E ora e cutter Jaguar di Guardacosta, hunto cu un boto special di Metal Shark a wordo manda pa e lugar.

   Finalmente a logra stop e Go-Fast, y abordo a bin topa cu dos Colombiano y un Dominicano.  Despues di a intercepta e boto, a lastre y hibe na e Pier di Guardacosta na Curaçao.

   A bin haya sa cu e hombernan aki tabata transportando droga den e Go-Fast.

   Tanto e hombernan y e droga a wordo entrega na Polis.  E cargamento di como 1.000 kilo di cocaina a wordo destrui mesora.