MIAMI: E cantante Gloria Estefan a confirma riba Diaranson, cu musica tabata su ‘escape’ di abuso sexual cu el a confronta como mucha muher chikito.
El a bisa esaki durante un foro organiza pa University of Miami (UM) riba violencia contra hende muher, y aki el a bisa cu el a haya sa cu e por conta su storia despues di morto di su mama na 2017.
E informe cu el a wordo viola, a sali publica caba na fin di September di e aña aki ora cu el a divulga den e programa di internet “Red Table Talk: The Estefans”.
E cantante cubanomericano, sinembargo a enfatiza cu el a haya apoyo di su mama, cu a yama Polis ora cu el a cont’e di e abusonan cu tabata worde cometi contra dje como mucha muher chikito, y door di su docente di musica, kende ta “un musico respeta na e ciudad”, y cu ta su mesun famia.
Durante e simposio virtual “Gender-Based Violence Against Women and Children in the Americas”, Gloria a comparti su experiencia cu otro victima- y representantenan di organizacionnan di yudanza y gubernamental.
Durante e foro aki, organiza pa Institute for Advanced Study of the Americas di UM, Estefan a splica cu e situacion traumatico ey a pone bira mas fuerte y cu el a comparti su storia pa asina e muchanan cu ta wordo abusa, haya sa cu toch nan por bira exitoso den bida.
El a insisti cu e no a papia antes di e caso aki, pasobra e ta un persona ‘cu ta sigui mira padilanti’, y pasobra e no tabata “kier pa e agresor tuma su poder” y specialmente pa proteha su mama.
“Mi mama a pasa hopi malo cu e situacion aki,” el a bisa cu lagrima na wowo ora di papia di e asunto.
El a agrega cu e abusadornan sa bon bon con pa silencia nan victimanan, ora di relata cu den su caso un menaza fuerte a wordo haci contra su mama, probechando di e hecho cu su tata tabata na Vietnam ora cu Gloria tabatin 8 aña di edad.
“Mi sa cu bo mama ta su so. Mi sa cu bo tata no tey aworaki. Si bo bisa hende, mi ta bay mata bo mama,” ta loke Gloria ainda ta corda di e menaza aki.
E cantante a enfatiza cu menos di 1% di e menornan ta gaña riba asuntonan di abuso sexual y e ta lamenta ademas cu un di cada tres muher mayor di edad al menos un biaha den bida a sufri actonan di violencia fisico y/of sexual cometi pa un homber, segun WHO.
Gloria Estefan ademas a agrega cu tabata hopi dificil pe, cu su mama no a bay haci denuncia na autoridadnan, specialmente ora el a haya sa cu durante 20 aña largo e agresor tabatin su mesun scol di musica.
“Pero mi mama tabata tratando di protehami, pasobra ora el a haya sa di e caso el a core yama Polis, pero autoridadnan mes a bise cu e lo bay pasa den stress cu lo ta mas peor di loke a socede cu e mucha,” el a indica. Pesey e mama a dicidi pa no haci entrega di keho oficial.
Loke a yuda Gloria Estefan hopi, ta pa concentra y mehora su mes den Musica, y esey a yude ‘scapa’ di e pensamento di e abusonan sexual aki.
E ta desea pa Merca bin cu un curiculo educacional obligatorio pa muchanan di Speelschool y tambe Scol Preparatorio, pa docentenan por siña studiantenan di e forma apropia di contacto y cu kende bo tin di papia si algo ta bayendo malo, y cu hende ta comete cosnan inaceptable cu nan.
