Presentacion di Reaseguro na Aruba
ORANJESTAD (AAN): - Asociacion di Seguro di Aruba (I.A.A.) a organisa un sesion di informacion dia 9 di juli 2024, den colaboracion cu AON Reinsurance pa su miembronan, brokernan interesa, y e autoridad di supervision, Banco Central di Aruba.
E sesion aki a concentra riba desaroyonan den reaseguro tanto regionalmente como globalmente. Alyssa Toland, Director di AON Reinsurance pa Caribe, a guia esnan presente den e situacion di reaseguro den e añanan resciente, desaroyonan di claims, e causanan di claims, y nan impacto riba primanan den un presentacion di un ora.
Reaseguro den Caribe ta un asunto complica y problematico, principalmente pa motibo di e nivel halto di riesgo cu e region ta confronta. Caribe ta hopi sensitivo pa disasternan natural manera horcan, temblor y inundacion. E eventonan aki ta resulta hopi biaha den daño significante na propiedad y infrastructura, subiendo costo di seguro y asina hasi reaseguro necesario.
Globalmente, reaseguradornan a mira un aumento den e cantidad di claims. Pa calcula riesgo manera desasternan natural y catastrofe, nan ta usa modelonan basa riba estadistica.
E modelonan aki ta permiti reaseguradornan pa hasi un pronostico rasonabel di un posibilidad pa un disaster natural y/o catastrofe den un aña particular.
E problema no ta den e calculacion y resultado di claims pa desaster natural y catastrofe, pero den otro riesgonan cu no por pronostica mesun facil manera guera, rebeldia, y condicionnan di clima severo manera yobida fuerte, tormenta acompaña pa inundacion, derame di tera, y daño na edificio y vehiculonan. E tiponan di dañonan aki a mustra un aumento preocupante den añanan reciente.
Ademas, e escala chikito di e mercado di seguro den Caribe ta hunga un rol. Hopi islanan tin un poblacion y economia relativamente chikito, resultando den un mercado di seguro limita. E falta di scala aki ta hasi esaki mas dificil pa companianan di seguro pa genera suficiente ingreso di prima pa cubri nan riesgonan y paga primanan di reaseguro.
Despues di un desaster natural severo den un region particular, e primanan ta subi drasticamente, poniendo un carga financiero grandi riba tanto individuonan como negoshinan. Esaki ta bira dificil pa e partidonan asegura pa mantene of haya cobertura suficiente den region.
Reaseguradornan ta evalua nan capacidad no solamente basa riba un pais especifico of grupo chikito di paisnan (manera Aruba) pero riba un region completo. Nan ta evalua e riesgo di daño pa e region completo y consecuentemente ta determina nan primanan di reaseguro. Esaki ta nifica cu aunke un pais manera Aruba no ta experencia horcan of otro desaster natural, eventonan otro lugar den e region por afecta e primanan di reaseguro pa riesgo na Aruba, manera parti di Caribe.
Otro problema ta e capacidad limita di e mercado di reaseguro. Reaseguradornan cu ta opera globalmente por tin duda pa ofrece cantidad grandi di cobertura den Caribe pa motibo di e riesgo halto. Esaki por lanta un falta di reaseguro disponibel, forzando compania di seguro pa pasa primanan mas halto na nan clientenan pa continua asegurando riesgonan.
Por ultimo, cambio di clima ta hunga un papel cada bes mas importante. E aumento den frecuencia y intensidad di desasternan natural ta aumenta e riesgo pa reaseguradornan empeorando problemanan existente.
Tuma accion riba e asuntonan aki ta pidi un combinacion di medidanan, incluyendo cooperacion regional y strategianan pa mehora maneho di riesgo. Solamente atraves di esfuersonan conhunto e mercado di reaseguro den e Caribe por fortalese sostenibelmente.
Asociacion di Seguro di Aruba (I.A.A.) ta considera importante pa hende ta conciente di desaroyonan den e tereno di seguro y kiko esaki ta nifica pa Aruba. Pa organiza y sostene presentacionnan riba topiconan di seguro, e aseguradornan conhunto na Aruba ta tin como objetivo pa contribui na e conscientisacion di riesgonan di seguro.
