ORANJESTAD (AAN): DOW a duna di conoce cu siman pasa nan a ricibi un reaccion riba social media unda ta indica cu na Eagle Beach tin materialnan di construccion benta tur caminda y ta duna imagen di ta sushi.
DOW ta informa cu na Eagle Beach tin un proyecto di embeyecemento y construccion andando. Esaki kiermen cu Eagle Beach ta un “bouwterrein” y ta mas cu claro cu tin materialnan di construccion visibel.
E materialnan den area di construccion no tin mag di forma un peliger pa nos turista y sigur pa nos localnan cu ta cana eybanda. Considerando cu ta trahando den area turistico e no mag di duna un impresion di ta sushi.
Mester menciona cu e contratista ta trahando cu orario modifica pa proteha e trahadornan di solo y calor. Kiermen cu ta trahando den ora nan di mainta trempan y ora nan laat di atardi/anochi cu ta haci hopi material visibel.
A avisa e contratista pa nan mantene un operacion decente/limpi y haci e area limpi na final di cada shift. Como reaccion nos a haya cu nan lo ruim op tur e material (palo nan) cu nan no ta uzando na e momentonan aki.
Por ultimo mester tene cuenta cu e area ta un area di construccion ainda.
