Glenda Hernandez a cuminsa como director di Arubahuis

ORANJESTAD (AAN)/Den Haag  – Señora drs. Glenda Hernandez a cuminsa  1 di juni cu su trabao como director a.i. di Arubahuis. Durante di un reunion Minister Plenipotenciario Guillfred Besaril a introduci señora Hernandez na e personal di Arubahuis.

            Minister Besaril a yama señora Hernandez bon bini na e team di Arubahuis y a bisa di ta hopi contento cu e nombracion di Glenda Hernandez como director a.i. pa reforsa e organisacion y yuda den e transicion cu Arubahuis ta pasando den dje na e momento aki. Esaki principalmente ta encera e decision cu Arubahuis ta bai muda pa un periodo temporal na un otro localidad. Cu e mudamento aki lo cuminsa tambe cu e trabao di renobacion di e edificio di Arubahuis na R.J. Schimmelpennincklaan.

            Glenda Hernandez pa hopi aña tabata director di Departamento di Asuntonan Social na Aruba y den tal funcion tabata hopi envolvi cu e Social Crisisplan. Prome cu su trabao na Departamento di Asuntonan Social, señora Hernandez a traha hopi aña na nivel di management na Hulanda.

            Prome cu e introduccion na e personal a tuma lugar un traspaso di trabao entre e director anterior mr. Glenn Ling y drs. Glenda Hernandez.

E potretnan ta cortesia di Arubahuis