GKMB tin un rol crucial den salud publico

Minister Mervin Wyatt-Ras

ORANJESTAD (AAN): Diaranson 7 di mei, Minister di Salud Publico, Asunto Social, Cuido di Adulto Mayor y Cuido di Adicto, drs. Mervin Wyatt-Ras, a asisti na un presentacion na Gele Koorts Muskieten Bestrijding GKMB.

GKMB ta un entidad di Gobierno importante y tin e tarea pa percura pa mitiga e presencia di sangura na Aruba, specialmente e variantenan cu por ta un menasa pa salud publico. Nan ta concentra nan esfuersonan principalmente den areanan di riesgo halto di criadero pero tambe di contagio, manera den areanan hotelero, residencial y mangroven. Durante di e ultimo añanan, e cantidad di malesanan manera Chikunguña, Zika y Dengue, no tabata alarmante na Aruba, mirando e bon trabao di conscientisacion di parti GKMB, pero tambe danki na e hecho cu no tabatin hopi yobida.

E personal di GKMB a keda hopi satisfecho cu presencia di Minister Wyatt-Ras, mirando cu nan ta sinta cu Gobierno anterior a lubida riba nan. E mandatario a sigura e personal di GKMB cu e lo duna nan e atencion debido cu nan merece pa nan trabao importante cu nan ta haci na bienestar di comunidad.