GKMB ta sigui haci un yamada na tur hende pa check cura pa obhetonan cu ta wanta awa

ORANJESTAD (AAN): Manera tur aña Gele Koorts Muskiet Bestrijding (GKMB) ta haci un peticion na habitantenan di Aruba pa

coopera y tene nan cura limpi, specialmente durante e temporada di yobida.

“E awa a adelanta e aña aki unda cu nos a haya yobida den luna di Juni caba y nos a ripara cu a cuminsa drenta varios yamada di molester”.

Ora nos bay controla kico ta pasando, nos ta ripara diferente cura no ta solamente sushi, pero tin cosnan den e cura cu ta wanta awa y esey ta pone cu 4 pa 5 dia despues di un yobida eynan por tin sangura caba. Esaki segun director di GKMB Luis Chong, den un entrevista cu DIARIO.

El a sigui bisa cu awor cu awa ta yobe e ta un bon training pa controla den cura y rond di cura, pa wak si tin cualkier obheto cu ta wanta awa y atende cu esaki.

DIARIO a puntra Chong si awa di airco por ta un problema pa den cierto cura pa loke ta sangura y el a splica cu hopi biaha hende ta colecta y uza e awa aki y si no ta asina mes, ora e druppelnan di awa di airco cay por ehempel den un hemchi, cada biaha e druppel cay e ta stroba e sangura di pone webo eyden.

“Loke nos ta topa hopi cune ta obhetonan cu ta keda den cura, den cual awa por keda acumula”.

E por ta un cos di hunga di mucha por ehempel, pero ketobay tire di auto ta un di e problemanan mas grandi den cura. Esaki segun e director di GKMB.

El a splica cu tin biaha ta haya bon cooperacion, pero tin biaha e trahadornan di GKMB of City Inspector ta haya problema pa drenta cura di hende. Sinembargo por lo general ta ricibi bon cooperacion.

,