Girigoria Croes a bay busca su Auto Electrico gana cu rifa di Aruba Lions Club

ORANJESTAD (AAN): E organizacion social di Aruba Lions Club semper tabata organiza nan rifa di un cas nobo, como nan evento principal pa recauda fondo. 

Pero awor ya nan no ta haci esey mas, como cu construccion di cas a bira hopi costoso y no ta rendable mas pa un rifa cu ta busca forma pa haya mas fondo pa yuda comunidad.

   Pesey e biaha aki na 2022, nan a tene nan Rifa pa aparatonan inovativo cu ta traha cu electricidad, incluyendo Auto Electrico, tambe Scooter Electrico, bicicleta Electrico, Step Electrico, y tambe auto di mucha.

   Den oranan di atardi, President di Aruba Lions Club, esta Rubin Ponson hunto cu demas miembronan di e organizacion a haci entrega di e premionan di nan recien rifa.

   E ganadora maximo a bira Girigoria Croes, un señora di Kas Ariba kende a cumpra su ticket cerca e miembronan cu tabata para banda di rotonde na Tanki Leendert.  El a gana un auto compacto Changan E-Star Electric Car color blanco.  Pa casualidad e señora tabata buscando un auto segunda mano pa cumpra, como cu esun cu e tabatin ta data di 2001, y no ta hopi eficiente mas.  Awor el a haya uno full Electrico, pues e ta stop di pone gasolin pa semper.  Djis charge su auto na cas.

   E premio di e Scooter Electrico a bay pa Gilbert Dirksz di Balashi.

   E premio di e Step Electrico a bay pa e hobennan Dylan y Dyron Arends.  E premio di Bicicleta Electrico y e Electric Toy Car lo wordo entrega despues, como cu e ganadornan ta den exterior.

   President Rubin Ponson a gradici nan sponsors y tambe a gradici tur hende di Aruba cu a yuda cumpra un rifa, pasobra cada placa ta bay yuda Aruba Lions Club yuda hende den comunidad.