Dia 29 tabata un “dia precioso”
ORANJESTAD (AAN) – Gino Frans, di Fundacion Eliezer La Posada, den un entrevista a comenta cu diahuebs 29 di September ultimo, tabata un dia precioso pasobra cinco hoben adicto a wordo manda pa Colombia, pa rehabilitacion y nan a bay contento.
Frans a declara cu e personanan cu ta bay Colombia, ta personanan hopi dificil, cu no kier cambia, cu nunca ta draai den un programa of no ta para keto den dje, y mester a bay afo.
Ta hobennan cu a wordo gara riba caba pasobra polis a haya ordo di ariba pa gara nan, pa trece nan hunto na La Posada, pa haci tur preparacion hunto cu Gobierno, pa manda nan Colombia.
Nan ta wordo prepara diez dia adelanta, pa nan wordo desintoxica, y drecha nan fisicamente pa nan subi avion, pasobra nan no a bin di nan propio boluntad, sino obligatoriamente. Nan ta hobennan cu a pasa caba, den tur centro na Aruba.
Gino Frans a subraya cu tin adictonan cu mester wordo obliga pasobra si warda pa nan cambia di mes, esey no ta bay sosode.
Gino Frans a bisa cu Diahuebs e hobennan tabata hari, subi avion contento pa bay Colombia, pa haya un bida nobo.
E hobennan a ingresa den un Clinica hopi famoso na Colombia, pega cu Bogota, di meneer Jan Paul van der Kuyp. E clinica aki tin diferente seccion: pa hende homber, pa hende muher, pa hende cu problema mental, y solamente pa adicto na droga.
Frans ta haya cu hopi importante ta pa tuma e ayudo cu ta wordo brinda y cu na Aruba no ta logra. E hobennan cu a bay diahuebs ta den e categoria yama “doble diagnosis” door cu nan tin problema mental y adiccion na droga. El a subraya cu e tin entendi cu Respaldo no ta yuda hende interno, sino solamente externo y pesey e institucion aki no por a tuma nan, ademas cu e lugar no ta adecua tampoco.
Na Aruba no tin lugar pa e personanan aki, y actualmente ta na Colombia nan tin cu bay. Gino Frans a señala cu tin un Stichting Hunto cu a lanta, y ta trahando un cas na Pos Chikito, cu lo habri otro aña cu poder di Dios cu si lo por zorg pa e hobennan aki ora nan bin di Colombia cu nan lo bay den Stichting Hunto, pasobra nan mester di un programa. Ora nan bin di Colombia nan mayornan no kier nan mas, kiermen nan no por bay biba cerca nan mayornan.
