Director Richela Dorothal:
ORANJESTAD (AAN) – Den un entrevista cu Richella Dorothal, director di DTI (Departamento di Inspeccion Tecnico), a duna di conoce cu aworaki nan ta bezig cu e parti di keuring y afspraak, pa e resto di aña, kiermen e tres lunanan nos dilanti.
Dorothal a splica cu esakinan ta e partinan esencial pa tin e keurings card valido, pa por bay DTI pa e keuring tuma lugar.
“Nos ta haci e peticion pa esaki tuma lugar trempan pasobra, hopi biaha, na final di aña den December of e ultimo dianan, mayoria di hende ta core bin pasobra nan ta bay paga e number plat of seguro ta vence, of e keurings cardnan tur ta vence pareu, y nos ta pidi pa nan pa haci nan peticion trempan, pa e ora ey nan haya nan fecha.
E dama a indica cu hopi lihe e cliente ta haya su fecha, esta ya despues di un siman di a haci e peticion. Pues, esaki ta bay den un proceso hopi lihe aworaki.
Richella Dorothal a menciona cu e vehiculonan cu ta wordo uza pa transporte publico ta haya un chens prome. “Pues nos ta duna prioridad na e parti di transporte publico den esaki”, el a reitera.
El a agrega cu e aña aki tin un total di 16.700 auto cu a haci un afspraak pa keuring pero den esaki tin como 4.000 cu no a presenta, pa keuring. Kiermen, nan ta tuma e fecha, of por ta nan ta uza esaki como documento pa mustra pero nan no ta yega na DTI, y esaki ta causa cu tin un cantidad di auto cu no ta yega nunca ni pa revisa e keuring pa por bisa den ki estado e autonan aki ta; y tambe tin e parti mas grandi cu no a ni haci, un afspraak pa keuring.
Director di DTI a señala tambe cu nan tin un bon relacion cu KPA, y varios biaha nan ta sinta pa wak e parti di keuring con ta evalua esaki, pasobra hopi biaha nan tin un termino fiho cu ta bisa cu autonan di compania, pick upnan, ta keur dentro di un aña; autonan particular ta dentro di dos aña, transporte publico ta dentro di un aña y pa cu esaki DTI ta bezig pa sinta cu KPA un bez mas, pa haya un presentacion pa cu esaki, Richella Dorothal a señala.
