ORANJESTAD(AAN)—E forma cu Aruba a reacciona riba e informacionnan di DIARIO, ta un indicacion cla di e dolor cu e proyecto di Aruba Boot Camp a ocasiona na e pais.
DIARIO a move cu investigacionnan pisa na tur nivel den Reino y na Aruba, ya cu e asunto aki ta mishi cu e tarea di Reino pa proteha Aruba cu ehercito y tur loke tin aspecto militar cu mester wordo regla pa ley.
Gilbert Webb awor ta aspira pa bira Prome Ministro di Aruba y kico e lo haci como Prome Ministro di e pais, ta bini dilanti den algun pagina cu ta mustra kico e kier haci den gobierno.
Gilbert Webb tabata tin 18 aña ora hunto cu dos miembro di su famia, el a inscribi su Bootcamp Aruba na Camara di Comercio.
Di e forma aki Aruba a bira scenario di un situacion poco biaha bisto na un pais democratico caminda mayornan ta entrega nan mucha cu no ta comporta pero tin entre 10 pa 22 aña na Comandante Gilbert cu a crea su propio ehercito.
Con el a logra yega na placa pa haya e edificio y tur loke e tin pa cual un solo biaha mayornan mester paga, no ta conoci te ainda. Ora mira portret di hobennan ta cushina riba piedra pafo den cura, pregunta ta surgi.
Algo increibel a pasa na Aruba, cu awor den eleccion 2021 mester tene na consideracion cu e tin un Hoofd Commandant riba lista pa drenta Parlamento y manera (segun informantenan) e ta bisa den su circulo, kier bira Prome Ministro di Aruba.
Kico lo pasa si Gilbert logra bira Prome Ministro di Aruba?
E cambionan cu e kier trece na nomber di loke e ta yama “hubentud” ta bisa tur cos.
Contrario na loke hende lo a pensa, e plan di gobernacion di Gilbert Webb no ta bay mehora e sistema educacional di Aruba cu ta mescos cu tur otro asunto, algun palabra den un plan cu sin duda muchanan mas chikito di su Camp a traha pa e presenta.
Loke Gilbert kier haci cu e sistema educacional nos lo presenta despues pasobra e ta parti di un plan total cu pa nos ta peligroso pa un motibo.
Gilbert su interes ta pa introduci un sistema financiero nobo na Aruba. Den e sistema aki, e modena Arubano ta keda mescos pero e no por circula manera e ta circula awor, pero por wordo gasta pa medio di computer segun un version di un sistema compurterisa.
Gilbert a crea un network financiero riba papel, cu ta papia di e hecho cu ni e Arubiano ni e turista por tin placa den su man pa gasta manera e kier.
Procesonan cu a tuma legisladonan siglonan pa introduci den e circulacion moderno di placa, den algun pagina ta wordo completamente kibra dor di Gilbert cu tin un forma nobo con via computer un sistema cu ta permiti control completo di placa dor di autoridad, ta wordo presenta.
E control aki no ta solamente pa loke comercio y e Arubiano ta haci cu su placa den un sistema nobo di belasting di Gilbert, pero tambe pa e turista cu for di momento cu e yega Aruba mester entrega su placa y mester paga tur cos online ya cu tur placa cu e tin lo ta online.
Pakico nos mester informa Aruba? Pasobra na Aruba a permiti Gilbert na edad di 18 aña, introduci un prison pa mucha cu segun nan mayornan no ta comporta na cas.
Mucha di 10 pa 22 aña (segun e registro di Camara di Comercio) por a cay bou maneho di Comandante Gilbert, sin ningun preparacion, den situacionnan escandoloso, a base di un concepto di bootcamp cu den exterior ta prison pa delincuente hoben.
Gilbert tin permiso hasta pa castiga e muchanan, cu ta cera den e prison sin por defende nan mes den condicionnan cu ni cacho bo ta permiti keda segun potret.
Awor como politico Gilbert ta presenta un maneho absoluto pa placa di Aruba, di tur ciudadano y di turista! Investigacionnan di DIARIO, ta continua cu e speransa cu autoridad tambe ta haci algo pa haya entre otro contesta con e “stichting” tin placa y kende ta financiado!
