Gianni’s Group a introduci nan proyecto di “GG Social Impact”

ORANJESTAD (AAN):  Diasabra cu a pasa Gianni´s Group a hasi un gran impacto cu nan proyecto nobo “GG Social Impact”.

E proyecto aki a wordo lansa durante e di dos edicion di Azia Restaurant & Lounge su “Earth Day - Candle Light Dinner”, mas cu 140 bishitante a celebra e lansamento nobo aki.  E evento a cuminsa unda bishitante nan a wordo yama bon bini cu un “Zero-Waste” Cocktail den e terasa di AZIA Restaurant & Lounge. Na mes momento tabata tin e oportunidad pa por a network y presencia e proyectonan di “GG Social Impact” mas di cerca. E CFO di e compania, Daniele Ferrara, a habri e parti oficial di e evento cu un presentacion di tur e proyectonan cu Gianni’s Group ta ehecutando riba Inversion Social, Conservacion Ambiental y Bienestar di Empleadonan.

   “Guia cu nos curason semper ta un di nos principionan fundamental, cual ta inclui den e nucleo di nos compania - awo, nos focus ta nos hende, planeta y ganashi – y yuda stimula Desaroyo Sostenibel na Aruba. Impacto Social ta nos manera pa mustra liderazgo cu accion y no cu palabra” ta palabra di CFO Daniele Ferrara. Den 2022 Daniele Ferrara a tuma un periodo liber for di su funcion den e compania pa bay hasi trabaonan voluntario pa diferente proyectonan social na Africa, Nepal y India.

   “Aña pasa, nos a traha duro cu un grupo di personanan for di diferente departamento di e compania pa desaroya nos strategia di Impacto Social, y nos ta masha orguyoso pa anuncia cu nos a caba di bira miembro di e Comite Ambiental di AHATA. Cu e rol nobo aki, nos kier stimula aliansanan fuerte na Aruba y mas aya cu ta duna bek na e hendenan pa medio di nos dedicacion na servicio, brasando diversidad y guia pa ehempel. Servicio ta nos principio fundamental pa tur cos cu nos haci - awo nos tambe kier sirbi e planeta” a agrega Deputy CEO y Lider di Impacto Social, Kirti Daryanani.

   Gianni's Group, un compania local di F&B establece na aña 1984, a implementa un cantidad di actividadnan den nan 13 restaurantnan y operacionnan, mustrando nan compromiso cu impacto social door di proyectonan manera: (*) Maneho di desperdicio (reciclamento di papel, azeta di cushina, snerp di papel). (*) Produccion di energia y sistemanan circular (panelnan solar, awa di airconan). (*) Digitalisacion di nos Servicionan y Operacionnan (GG2GO, CiaoGG, Software).

   Gianni's Group a brinda sosten tambe na e hobennan di nos comunidad pa medio di actividadnan pa haya fondo manera “Gianni’s Group Walk and Run” y organisacionnan local manera Scolnan di SVGA: "Pasadia Briyo di Solo", Centro "Man na Obra", Scol Caiquetio; y "Scucha nos", SECA, Soccer Education Center Aruba, "A Brighter Future Academy" y Heart-Centered Leadership Foundation. E trabou continuo di e compania ta pa crea un balanse entre hende, ganashi y planeta, conoci como e “triple bottom line” door di a haci e iniciativanan corespondiente cu e metanan apropia di “United Nations Sustainable Development Goals”.

   E concepto di "Earth Day" a ser crea pa yuda hende keda mas alerta riba Desaroyo Sostenibel y e necesidadnan pa proteha e Medio Ambiente. E bishitantenan a disfruta di un “Candle Light Dinner’ cu musica y entretenimento en bibo, cu un “four-course menu” y biña organico di Arion Wine Company. Daniele Ferrara a finalisa e evento compartiendo e siguiente cu e bishitantenan: “Mirando e situacion actual na Aruba, nos na Gianni's Group kier promove solucionnan mas innovador ora ta trata di desperdicio, reciclamento, energia limpi y en general con nos trata nos isla, poniendo e ser humano central. Esaki ta nos receta pa exito y tambe lo sostene desaroyonan sostenibel di Aruba”.