ORANJESTAD (AAN): E ultimo simannan Partido MEP por a nota un interes grandisimo di Fraccion di AVP den e caso di vacuna cu ta wordo investiga pa Ministerio Publico.
Miembronan di e fraccion berde Wyatt Ras, Gerlien Croes, Dowers y De Meza a mustra masha hopi interes den e caso aki.
Te cu awor Gobierno di Aruba a contesta mas di 100 pregunta di AVP riba e topico aki y a duna TUR transparencia. Pero ta parce cu AVP no por of no kier compronde.
Remarcable ta e hecho cu ningun miembro di fraccion di AVP te cu awe no a haci ningun pregunta, ningun conferencia di prensa, ningun reunion publico y ningun relato di prensa pa elabora riba casonan di Paul Croes (sentencia pa corupcion na 4 aña di prison) y e caso di nan colega Benny Sevinger.
Pueblo ta condena e forma di hiba politica di AVP, pero especialmente Gerlien Croes. Un hurista cu ta demostra un actitud asina di tapa corupcion! Un hoben politico cu a wordo influencia pa e politica di venena pueblo, instiga y ataca tur cos na Aruba.
Ningun integrante di AVP por tin moralidad pa papia di corupcion si te dia di awe nan NO por a distancia nan mes di e caso mas grandi di corupcion di Aruba cu ta esun di Benny Sevinger. Cu nan cara di palo nan ta sinta banda di Sevinger den Parlamento di Aruba, bras’e y papia di corupcion. Hopi curashi un hende asina mester por tin y un sinberguensa so por haci tal.
Ademas, ainda pueblo ta warda e parlamentario mas hoben di AVP, Gerlien Croes, splica pueblo ta PAKICO e no por drenta Merca. Ya ta dos luna cu e ta wordo cuestiona y e no ta duna cara. Mare e por demostra e mesun curashi cu e ta mustra pa defende Benny, pa e defende su mes. Mientras tanto, pueblo ta warda!
