Guera aki por laga nan sin LNG Gas....
KINGSTON: E compania cu ta genera coriente pa Jamaica, esta “Jamaica Public Service Company” (JPS) ta teme cu e mercado di energia muy pronto lo bay confronta un crisis di suministro, y pesey ya caba a cuminza busca siguranza di e companianan petrolero si nan tin plan di contingencia pa sigui abastece nan cu combustible, durante e guera aki na Europa.
Den ultimo cinco añanan, e compania JPS a bin ta reduci su dependencia na petroleo, pero su cambio constante pa gas natural ta enfrentando un obstaculo nobo, ya cu e paisnan mas poderoso di mundo ta apunto di restructura e cadena di suministro pa asina Europa por reduci su dependencia di Rusia door di busca fuentenan di otro mercado.
E blok di Union Europeo aparentemente tabata ricibi 40% di e gas cu nan ta consumi for di Rusia.
E guera y su repercusionnan riba energia a hisa prijs di crudo na casi US$ 120 pa bari, y gas natural na US$4,92 pa 1.000 pia cubico (te cu Diabierna atardi). Diabierna atardi prijs di WTI Crude a pasa riba US$ 115 pa bari, y prijs di Brent Crude a pasa riba US$ 118 pa bari.
Pa e compania JPS di Jamaica, di cual su red di electricidad ta wordo genera 2/3 parti pa LNG Gas, e preocupacion di mas grandi no ta e prijs di materia prima, sino di e seguridad di tin e fuente pa genera coriente.
E crisis di berdad pa Jamaica, ta si acaso nan lo haya stock di LNG Gas na tempo of no.
Pesey ta cuminza pidi varios compania cu ta suministra Fuel Oil, y tambe esnan cu ta suministra LNG Gas, pa sa ta con resiliente nan ta e dianan aki.
