E por drenta Parlamento como Opositor di su mes den Gobierno actual?
- Geoffrey Wever nombra como Raiz mester entrega su retiro awe
- Gobierno Wever-Croes 2 na mando te huramento Gobierno nobo
ORANJESTAD (AAN) Pa democracia ta realidad, leynan mester wordo respeta y no por mishi cu nada cu ta pone cualkier parti di e Orden di Ley como base di e pais na peligro.
Actualmente Aruba ta prepara pa un eleccion nobo cu ta nifica cu Pueblo di Aruba ta bay dicidi, cual lo ta e partidonan cu mester tin asiento den Parlamento despues di eleccion.
E fecha di eleccion a wordo stipula legalmente a base di e Ley cu ta bisa cuanto tempo despues cu un Gobierno bira demisionario y dicidi cu ta “ontbind”(disolve) Parlamento, mester tene eleccion pa yega na huramento di e Miembronan nobo di Parlamento.
E momento cu Miembronan nobo di un Gobierno tuma asiento, no ta e momento cu un Gabinete nobo ta tuma asiento.
Formacion di un Gobierno nobo ta tuma su tempo pasobra mester cubri e trayectoria di nombramento di un Informador, Formador, y asina por sigui.
Ora yega na un Gobierno nobo, Ministronan nobo ta reemplaza e Gobierno na mando cu ta bay goberna a base di e programa di Gobierno cu nan a introduci.
Candidatonan pa e diferente partidonan cu ta participa na eleccion, ta haci esaki pasobra nan ta di acuerdo cu e partido den tur sentido y ta sostene e programa di accion cu partidonan ta ofrece na personanan cu lo vota.
Geoffrey Wever ta Ministro di un Gobierno y a forma parti importante di e Gobierno di Evelyn Wever-Croes, den cual e te awe tin e cartera di Ministro di Asuntonan Economico y aunke demisionario por tuma decisionnan “di emergencia”si esaki ta necesario.
Pa Geoffrey Wever por ta na e momentonan aki Ministro di Gabinete Evelyn Wever-Croes 2, e ta ehecuta e programa cu a wordo inicia bou Gabinete Evelyn Wever-Croes 2 pues ta traha den cuadro di e Acuerdo di Gobernacion cu a wordo logra entre MEP y Raiz a base di cual e Gobierno a wordo forma.
Pagonan cu mester wordo haci, pues placa di Pueblo cu ta wordo uza na e momentonan aki, ta pa paga Ministronan cu a wordo presenta dor di e partidonan MEP y Raiz, a base di e compromiso di coalicion cu ta nifica cu e dos partidonan ta di acuerdo riba e manehonan cu nan a tuma como coalicion.
Gerlien Croes ta miembro di Parlamento y Opositor firma di e Gobierno actual, pues di RAIZ y asina di e maneho cu Geoffrey Wever tambe a hiba como Ministro.
Geoffrey Wever te awor ta miembro di e Gabinete Wever-Croes 2, cu Gerlien Croes ta opone den Parlamento y ta base di e partido nobo di Gerlien Croes cu a forma un acuerdo pa accion comun den un partido cu como lidernan Gerlien Croes y Geoffrey Wever.
Pa esaki por ta posibel, Geoffrey Wever ta entrega e prueba cu e no ta di acuerdo cu e forma cu Gobierno Wever-Croes, di cual e mes ta forma parti, ta goberna.
Riba lista di oposicion pa proximo eleccion, Geoffrey Wever cu Pueblo ta paga pa duna continuacion na su maneho como Ministro di Gabinete Wever-Croes en representacion di partido Raiz, ta bay contra e filosofia di Gobierno actual pasobra partido Futuro di Gerlien ta opone e maneho di Gobierno Wever-Croes den Parlamento.
Raiz tin e deber di atende cu e asunto aki pasobra ta como representante di Raiz, Geoffrey Wever ta Ministro a base di e coalicion MEP/Raiz, cu a alcansa un acuerdo con ta goberna.
Ta e acuerdo di Gobernacion aproba dor di mayoria den Parlamento, Geoffrey Wever a wordo paga y ta wordo paga pa fungi como Ministro.
E pregunta mas serio cu ta bini ta, kico lo pasa despues di eleccion pasobra lo no forma un Gobierno mes dia.
Si Geoffrey Wever ta Ministro ainda dia di eleccion, e por sinta spera e momento cu ta eligi un Ministro nobo como miembro di Parlamento pa e partido Futuro di cual e y Gerlien ta miembro?
Un situacion constitucional serio a presenta su mes den seno di Parlamento y DIARIO lo sigui informa Aruba debidamente.
Mientrastanto na momento cu Geoffrey Wever bay deposita su voto como Ministro di Gabinete Wever-Croes, e lo vota contra e maneho cu e ta hiba como Miembro di Gabinete Wever-Croes a base di e acuerdo di gobernacion den cual su partido original RAIZ, a bay di acuerdo cu MEP como e partido formador di Gabinete Wever-Croes 2, kico ta base di principio di gobernacion di Gabinete Wever-Croes, cu partido di Gerlien Croes ta rechaza.
Cu otro palabra, Ministro Geoffrey Wever ta splica e votadornan cu su trabou como Ministro tabata basa riba un acuerdo di gobernacion cu e no por aproba.
Presencia di Ministro Geoffrey Wever actualmente den Gabinete Wever-Croes ta mishi cu e sistema di gobernacion democratico na Aruba y e ta gana un suelo como Ministro di un Gabinete cu un partido mayoritario cu e no por sostene.
Mientrastanto problema a resona cu e carteranan di Ministro Endy Croes, cu lo mester wordo reemplaza dor di Ministro di Husticia Rocco Tjong, cu ta hopi ocupa cu e carteranan di Glenbert Croes, loke a haci cu Prome Ministro Wever-Croes a anuncia cu e mes lo ta encarga cu e carteranan di Ministro Endy Croes.
DIARIO lo sigui informa Aruba.
