E reto grandi di eleccion 2024 ta pa kibra logro di Xiomara Maduro
- Awe Aruba orguyosamente ta paga debe pero sin muri di hamber
- Hasta Hospital tabata moribundo ora el a hereda cuido di Florin
ORANJESTAD (AAN) Na 2017 ora eleccion a resulta den Gobierno Evelyn Wever-Croes, Pueblo di Aruba a dicidi pa habri un caminda nobo pa futuro.
Un pais den consternacion total, no por a mira su futuro mas y tabata parce aplasta pa un debe nacional como parti di total di debe cu a keda atras di gobernacion di Mike Eman.
Na final di 2024, un Aruba completamente diferente ta acudi na urna electoral pa dicidi pa su futuro.
Ta na logronan ta reconoce kende ta naci pa ta gobernante, capaz di cambia e tragedia di un Pueblo den logro y alegria.
Eleccion 2024 di Aruba ta basa riba un realidad, cu lidernan capaz por dirigi un Pueblo na un haf sigur den e tempestad mas grandi cu Aruba a conoce.
Na 2017 ora Gobierno Evelyn Wever-Croes a tuma mando gubernamental di Aruba y mr. Xiomara Maduro a wordo encarga cu cuido di Florin, hasta Hospital tabata moribundo.
Interesante ta e sonrisa di e experto financiero Xiomara Maduro, cu na un forma masha simpel, cu palabra cu tur hende por a comprende, a splica cu ta temponan dificil ta spera Aruba pero cu Aruba lo a recupera.
Cu un sonrisa, alegria, simplesa, Ministro Xiomara Maduro a duna contenido na e plannan di e Gobierno cu e nomber di Evelyn Wever-Croes, cu tambe masha trankil a splica Aruba con lo mester landa den e awanan bruto di e situacion financiero, cu el a hereda.
Florin mester a lora y Florin a cuminsa lora, aunke mester a tuma medidanan pa yena e caha bashi cu Gobierno Evelyn Wever-Croes a hereda.
Pero cu e poco Florinnan cu a resta, Aruba a subi e caminda di un porvenir nobo.
Critica continuo di Reino a wordo silencia ora na 2020, Ministro Xiomara Maduro a entrega Aruba un presupuesto cu un saldo positivo.
Covid-19 a ataca. Hulanda a declara Aruba bancarota ora mester a presta 500 Miyon mas pa sobrevivi Covid-19.
Den tur e problemanan, Ministro Xiomara Maduro a sigui fortifica e animo di Aruba cu su sonrisa, su actitud positivo y medidanan cu e mester a tuma pa Aruba por a sigui cana.
“Florin mester lora”. Florin a sigui lora hasta ora Covid-19 a cera comercio y turismo y asistencia di Gobierno pa companianan a haci posibel pa nan mantene nan personal y evita cu Pueblo di Aruba lo a keda sin pan riba mesa.
Florin a lora. Florin a sigui lora, dal un buelta y bandona e situacion di Covid-19 pa habri un caminda nobo pa futuro.
Hopi tabata esnan cu a hari ora na 2021 a wordo splica cuna 2024 ya Aruba lo a bandona e problemanan mas grandi di Covid-19 den un mundo cu a conoce amenaza di recesion na 2021 y despues un Guera na Ukraine.
E animo di Aruba no a bay perdi. E caminda pa futuro cu mr. Evelyn Wever-Croes como lider, e bira e ruta financiero pa Xiomara Maduro, cu a entrega na Pueblo di Aruba e logro cu ni Hulanda mes aparentemente por logra te awe.
Na caminda pa celebracion di 40 aña Status Aparte, mr. Xiomara Maduro, como e experto financiero di Gobiernonan Evelyn Wever-Croes ta entrega mundo e prueba di loke perseveransa di Aruba, ta produci.
Awe orguyosamente Aruba ta paga su debe pero no a base di orguyo falso y sin cu Pueblo di Aruba ta muri di hamber.
Orguyosamente Aruba ta paga su debe cu entrada produci pa crecemento di Aruba, cu ta causa admiracion di henter mundo.
Hasta e hospital cu tabata moribundo na un cadena di problema, a recupera y awor tin un ruman pariba di brug pa sigui cuida salud di e Pueblo di Aruba.
Rumbo pa 40 aña Status Aparte, mr. Xiomara Maduro ta entrega Reino Hulandes, e prueba mas grandi cu Aruba por carga e responsabilidad di autonomia y bira ehempel di bon gobernacion, a base di un maneho experto pero semper acompaña pa un sonrisa.
Eleccion 2024 ta topa cu un Aruba manera priminti na e Pueblo di Aruba na 2021, ora a presenta plannan pa confronta e realidadnan mundial cu Covid-19 a laga atras.
Florin a lora y ta sigui lora na un forma responsabel, di acuerdo cu e Ley di Contabilidad, e base democratico real y di acuerdo cu e leynan sagrado pa maneha placa cu Pueblo ta produci cu sufor di su frenta.
Sacrificio a wordo pidi di Pueblo, cu na 2024 ta grita “bingo”pa e logronan cu Aruba a alcansa, guia pa e experto financiero mr. Xiomara Maduro, cu a entrega mundo y historia, e concepto di un bon maneho financiero cu a base di Ley ta dirigi un Pueblo na su felicidad!
