ORANJESTAD (AAN): E ta algo hopi bunita, atractivo, y sigur hopi util. Pa bo mes, of pa cualkier studiante!
Hasta bo por cumpre pa asina regala bishitantenan cu bin e isla. Gobernantenan por usa esaki pa regala cualkier dignatario of bishitante special di exterior.
Ta trata aki di un ‘planner’ nobo lanza riba mercado. Y e ta birando realidad danki na e hoben local Genevie Geerman.
Genevie a gradua recien den trabao social y a base di experencianan como studiante a dicidi di establece su propio empresa di productonan pa oficina y hobby. Sigur un bunita iniciativa basa riba experencia profesional y personal.
Den un entrevista cu DIARIO, Genevie a bisa: “Como studiante hopi bes mi tabatin dificultad con pa maneha mi placa. Mi a dicidi di traha un tracker di presupuesto pa asina cada luna mi por maneha mi placa mihor y spaar tambe. Asina mi a cuminsa desaroya mas sistema di planning y a comparti esaki cu mas hende.”
Hayando reaccion super positivo, el a dicidi di diseña un planner den Papiamento. “Mi a dicidi di traha un planner pa crea costumbernan nobo y asina resolve problema y situacionnan den trabao, studio y bida personal,” Genevie a bisa. “Den e planner mi a hinca tur e diferente modelonan cu mi mes a usa pa ta mas eficiente y asina bira miho organiza y mas felis. E planner aki ta diferente cu otro plannernan door cu cada luna tin un diferente estilo di lay-out, esaki ta yuda pa bo ta creativo y planea bo bida, estudio y trabao na un forma practico y sabi.”
E ta yudabo pasobra e ta un planner pa 12 luna. Bo mes por dicidi cu cua luna bo ta cuminsa. Cada luna tin un resumen di luna, un diferente lay-out, un tracker di presupuesto y tracker di luna. Tambe cada luna ta bin cu un combinacion di: menu di siman, tracker di costumber, metanan di siman, lista di tarea, top prioridadnan, anotashonnan y lista di compra. Tambe cu un bookmark di Aruba, 8 sticker di Aruba y sticker di e lunanan. Asina cada persona por personalisa e planner segun su gusto.
Na Aruba e ta obtenible na Indira Skincare (Savaneta 91). A compronde cu scol-, compania- y organizacionnan por cumpr’e na cantidadnan mas grandi. Studiante, mayornan y profesionalnan na Hulanda por cumpra e planner via www.planwithmebygenevie.nl y tambe empresanan cu ta desea di bende e planner por tuma contacto cu Genevie directamente.
E planner ta un regalo bunita y practico cu ta yuda studiantenan pa tin un bida independiente y exitoso. Tambe pa oficina y na cas e ta yuda den un bida bon organiza y feliz.
