Expertonan ta lansa un advertencia serio na caminda pa 2024
- Na caminda pa prome lustro di Covid-19 prioridad pa e mucha
- 2024 mester atende cu herencia real di generacion mas hoben
ORANJESTAD (AAN) “Na 2024 mundo mester recorda, cu na un momento of otro na 2019, un enemigo historico a bati na porta di mundo pa destrui hende. Segun informacionnan registra, 2024 lo bira e prome lustro cu horor a bati na porta di mundo, cu un enfermedad cu por wordo considera como peste.”
Palabranan di expertonan cu kende DIARIO ta atende, e asuntonan mas importante cu no solamente na Aruba pero na henter mundo mester haya tur atencion.
Loke sigur merece tur atencion, ta e alarma cu a wordo bati dor di expertonan riba diferente tereno pa e forma cu mundo ta atende cu Covid-19.
“Nos ta papia di Generacion X y Generacion Y den intento pa crea un catalogo segun edad pa habitantenan di planeta Tera,” informantenan ta trece dilanti.
Informacionnan valioso ta wordo entrega na DIARIO cu e advertencia, cu e generacion cu actualmente mester haya tur atencion, ta e generacion di mas hoben cu mundo conoce actualmente y cu lo sigui crece na 2024.
“Na 2024, lo ta cinco aña, cu muchanan a nace cu un enfermedad mortal cu nan a hereda prome cu nan a mira luz di dia,”informantenan ta splica.
Esaki ta encera cu un parti importante di poblacion di tur pais na mundo, sea a nace cu e enfermedad of na un edad sumamente hoben, a haya e enfermedad, cu na prome instancia a wordo completamente ignora ora ta trata di mucha, pasobra e cantidad di mucha cu tabata muri tabata chikito compara cu e cantidad di personanan di mas edad.
Muchanan cu tabata nace aparentemente sano, no tabata haya e atencion cu nan tabata merece pero si a wordo reconoce como uno di e vehiculonan mas importante den transmision di e virus, cu a destrui hende y mundo.
“Mundo conoce un generacion cu e no kier reconoce manera mester ta, cu ta e generacionnan di mas hoben na mundo, cu a bira y ta sigui bira e fuentenan mas grandi di e malesa cu te ainda ta mata hende rond mundo,”a bini dilanti.
Pa atende cu Covid-19 mester a uza bacuna, cu mester a yuda e cantidad di victimanan mortal di Covid-19.
Mientrastanto muchanan cu a haya e malesa cu lo no tabata di gravedad pa hoben y mucha, a desaroya e virus den nan curpa y den cantidad creciente di casonan, ta nace cu e virus como nan compañero di bida, manera informantenan ta indica.
Un alarma grandi a wordo bati pa e forma cu muchanan ta sigui wordo afecta continuamente pa e malesa, loke por tin efecto enorme riba nan condicion di salud riba termino largo.
Preocupacion enorme ta existi pa loke riba termino largo por nifica no solamente pa e salud fisico di e mucha, pero tambe e experencianan cu e pandemia di Covid-19 a laga cerca muchanan cu a bira victima di condicionnan y situacionnan desastroso cu Covid-19 a crea y laga como herencia.
E efectonan mental di Covid-19 riba e generacion mas hoben actualmente, ta presente, segun informantenan.
E Generacion Covid-19, muchanan cu a nace of tabata mucha ora e malesa a ataca, a conoce experencianan horibel compara cu condicionnan di angustia y miedo pa guera por ehempel.
Pero na mes momento, muchanan a bira e victimanan mas importante di abuso sexual por ehempel y mester a atende cu e stress mental cu e pandemia a ocasiona.
No por a bay school. No por a brasa hende. E cultura di morto tabata bira parti di muchanan, cu te awe continuamente ta mira nan bida interumpi pa otro brote di Covid-19.
Ademas tin un cantidad di caso creciente di enfermedad cerca mucha contagia cu Covid-19 cu ta afecta partinan importante di curpa di hende.
Informantenan clave di DIARIO ta sumamente preocupa cu loke nan ta considera e forma cu mundialmente kier deshaci di e impacto di Covid-19 y ta di opinion cu no solamente mester mustra cu ainda e enfermedad ta sigui mata y cualkier momento por rementa den otro crisis pasobra te awe tin factornan desconoci di e malesa.
E cantidad di caso di Covid-19 cu ta wordo registra actualmente na nivel mundial, a bolbe subi. Tin versionnan nobo di Covid-19 y tur dia tin mucha ta nace cu e enfermedad.
“Na 2024, e generacion nobo di mundo cu a nace durante of despues di 2019, mescos cu e tur cu tabata mucha y hoben durante e prome etapa di Covid-19, mester haya atencion riba tereno medico fisico y mental,” informantenan ta indica cu preocupacion serio pa muchanan y hobennan cu a wordo infecta mas biaha cu e malesa cu te awe ta un enemigo desconoci pa hende riba diferente tereno.
