Gateway 2030 ta ehempel cu nos mes Arubianonan por percura pa un proyecto di tal magnitud!

Parlamentario Edgard Vrolijk orguyoso:

ORANJESTAD (AAN)-- Parlamentario Edgard Vrolijk, si Fraccion di Partido Movimento Electoral di Pueblo (MEP), den entrevista cu Matutino DIARIO, a menciona cu nan a haya oportunidad di haci bishita na Aeropuerto Reina Beatrix, na e Proyecto Gateway 2030, unda a mira con e fase 1-A a termina, y tambe con esaki ta funciona.

“Banda di esaki tambe nos a wordo presenta cu e siguiente fasenan di e proyecto y con avanza nan ta. Aki mi tin cu manda un felicitacion na tur nos trahadornan local, management, y tur esnan cu a haci esaki posibel, e contratistanan y seguramente e trahadornan di Triple A.

“Una bez bo por wak esaki, y manera mi a bisa na IPKO y mi ta keda para riba dje, nos mes Arubianonan por. Y esey ta algo cu mi ta keda resona durante e plataforma aki, unda cu cada bez cu nan ta bisa cu nos mester di supervision, nos mester di control, mi ta keda bisa nan: ‘nos Arubianonan mes por’. Awe tabata un  ehemplo di con nos Arubianonan a percura pa e proyecto aki wordo ehecuta, nos Arubianonan ta esnan cu ta controla, y nos por ta orguyoso di nos Arubianonan”, Parlamentario Edgard Vrolijk a remarca.

Finalmente el a expresa cu “Balashi ta di nos, a well esun di Triple A tambe ta di nos, y nos tin cu duna nan balor, como localnan con duro nan a traha p’asina ey nan por a percura pa un proyecto di e magnitud aki”, Parlamentario Edgard Vrolijk a resalta.