Miguel Wever, Coordinador pa Ministerio di Asuntonan General
ORANJESTAD (AAN): E accion pa kita vehiculonan bandona cu ta ocupa caminda y espacio publico ta un siguiente paso den e esfuerso coordina pa drecha, haci limpia y pone mas orden den centro di Oranjestad.
Miguel Wever, Coordinador pa Ministerio di Asuntonan General, a indica cu durante e ultimo lunanan e situacion di vehiculonan cu pa tempo largo ta para den diferente area a wordo identifica y sigui. Awo e proceso ta drentando den su fase concreto.
Doñonan di e vehiculonan ainda tin menos cu un siman pa retira nan auto boluntariamente. For di 24 di september, KPA y e instancianan concerni lo cuminsa cu accion pa retira vehiculonan bandona cu ainda ta den e areanan identifica.
Segun Wever, e accion no ta un iniciativa aisla. E ta conecta cu e trabou mas amplio cu ta tumando luga pa revitalisa centro di ciudad y mehora e condicion di cayanan y espacionan publico.
Un centro cu ta renoba y manteni mester tambe ta un centro limpi, accesibel y ordena. Vehiculonan cu ta keda bandona pa tempo largo den espacio publico no ta cuadra cu e direccion ey.
Ultimo dianan pa actua boluntariamente
Wever ta enfatisa cu e intencion di e periodo di aviso ta precisamente pa duna doñonan oportunidad pa resolve e situacion nan mes, prome cu autoridadnan mester interveni.
P’esey e yamada ta pa no warda te ultimo momento. Despues cu e periodo di aviso caba, e accion lo sigui y e gastonan relaciona cu retiro di e vehiculo lo keda pa cuenta di su doño.
E prome fase ta concentra na Oranjestad. Segun Wever, esaki lo permiti e instancianan envolvi evalua e proceso den practica y atende eventual puntonan cu mester ahusta.
Pero e meta no ta pa keda solamente den centro di ciudad. E intencion ta pa, despues di e prome fase, sigui amplia e accion gradualmente pa otro areanan di Aruba.
Pa Wever, e iniciativa ta finalmente un cuestion di responsabilidad comparti: Gobierno y e instancianan ta haci nan parti pa drecha y mantene espacio publico, mientras cu cada doño di vehiculo tin responsabilidad pa percura cu su propiedad no bira un problema pa comunidad. Dia 24 di september e accion ta cuminsa. E yamada na doñonan ta pa uza e dianan cu ta resta y retira nan vehiculo boluntariamente.
