Segun Director di AZV, Edwin Jacobs:
* Colombia ta keda e destinacion number un pa cumpra cuido
ORANJESTAD (AAN): Director di AZV, Edwin Jacobs a duna di conoce durante un conferencia di prensa cu recientemente el a bishita Colombia y tabata tin oportunidad di reuni cu representantenan di e 4 hospitalnan caminda AZV sa manda pashentnan di Aruba.
El a laga sa cu durante 2021, e gastonan di AZV pa loke ta mandamento di pashentnan den exterior a baha y esaki tin di haber cu e hecho cu ImSan na San Nicolas a cuminsa duna tratamento di radioterapia como tambe a cuminsa haci operacion di wowo.
Esaki a pone cu e gastonan di e organo di seguro pa cuido den exterior a baha. Na aña 2021, AZV a cumpra na cuido regular 27 miyon florin. Ora cu ICU a yena, a manda diferente di e pashentnan cu mester a bay a haya cuido special, a manda nan Bucaramanga y esey a costa 7.7 miyon florin. Den total, aña pasa a gasta 34.7 miyon florin di e gasto total di 400 y pico mil locual ta representa 8% di nan presupuesto anual, a bisa.
E suma aki tabata mas halto, pero danki na ImSan a gastonan aki a baha compara cu e añanan prome pa loke ta cuido den exterior, Jacobs a indica.
Na 2021, 76% di e pashentnan a bay Colombia, 21% a bay Hulanda y 3% a bay Merca. Colombia ta keda den e lista di preferencia caminda ta cumpra cuido specialisa pa e aseguradonan, a remarca.
Pa loke ta e prome mitad di 2022, a cumpra caba cuido na balor di 19.7 miyon florin. Mester corda na 2020 Colombia a cera fronteranan y e pashentnan mester a wordo manda Hulanda. Pesey te cu aña pasa tabata dificil pa cumpra cuido na Colombia, pero for di 2022 e posibilidad aki a habri bek.
Colombia ta keda e destinacion number un pa cumpra cuido den exterior, a agrega.
Pa loke ta cantidad ta mira cu pa Colombia, e prome mitad aña a surpasa caba locual AZV ta cumpra den total na 2021. Merca ta casi igual y tambe Hulanda. A mira un aumento den cantidad di aseguradonan cu ta mandando pa exterior ya cu e fronteranan ta completamente habri, e director di AZV a duna di conoce.
