Premier Wever-Croes a anuncia:
- Lo baha e impuestonan riba entrada di salario pa pensionadonan
- Tarifa di winstbelasting pa e companianan lo wordo reduci
ORANJESTAD (AAN): Diahuebs atardi, Gobierno a yama un conferencia extraordinario unda Prome Minister Evelyn Wever-Croes y Vice Prome Minister Ursell Arends a haci un anuncio importante riba e topico di reforma fiscal.
Premier Wever-Croes a cuminsa bisando cu e reforma fiscal ta un parti di e acuerdo cu Hulanda den cuadro di e Landspakket. Parti di e reforma fiscal ta concerni e asina yama BTW. Pa esaki, Departamento di Impuesto a reuni cu e gremionan. El a bisa cu e tambe a reuni cu gremionan y a scucha preocupacion di gremio comercial, sindical y comunidad en general riba e introduccion di un impuesto BTW.
A papia riba e preocupacionnan riba e efecto inflatorio di esaki, pero tambe e preocupacion di comercio ora cu a indica cu no lo bay baha BBO pa despues bin cu BTW y tur esaki lo a causa un efecto inflatorio toch mas halto, a splica.
Prome Minister a laga sa cu a haci e calculacionnan di e efecto inflatorio aki "y en bista di e guera na Ukraine y su efectonan na Aruba, a yega na e conclusion cu esaki no ta e momento prudente pa introduci e BTW pa 1 di Januari 2023.
El a agrega cu despues di consulta cu Minister di Finansas y su ekipo a tuma e decision cu no ta sigui cu introduccion di BTW di 6 pa 14 porciento. A remarca cu e necesidad financiero si ta keda y pesey ta contemplando cu na lugar di BTW, introduci un aumento di BBO di 1 pa 1,5 porciento.
A haci e calculacionnan di e efecto inflatorio riba e dos posibilidadnan. E efecto inflatorio di e BTW ta casi cuater biaha mas halto cu si solamente hisa BBO cu 1 pa 1.5%, segun e mandatario.
Banda di e aumento aki di BBO ta contemplando aden pa bin cu compensacion y baha e impuestonan riba entrada di salario pa pensionadonan. Tambe ta pensando di reduci e tarifa di winstbelasting pa e companianan, Wever-Croes a expresa.
Prome Minister a duna di conoce cu Gobierno cu e situacion na Aruba ta sigui dificil mescos cu henter mundo door di Covid, un pandemia devastador cu casi a kibra economia. Turismo berdad a cuminsa crece pero no a yega 100% ainda, e economia no a yeg’e ainda tampoco. Nos ta casi di yega e turismo di prome cu pandemia.
Y riba esaki, ta sufriendo tambe e efectonan secundario di e guera na Ukraine. Prijs di crudo y di gasolin internacional a subi, tur producto cu nos ta importa a aumenta internacionalmente. Awa y coriente tambe a aumenta temporalmente y no ta na Aruba so sino henter mundo ta mirando e desaroyo aki. Hulanda ta pasando den e pio inflacion den e 50 añanan, Merca ta papiando di un recession. E guera di Ukraine tin un efecto grandi pa henter mundo.
Banda di esaki tambe, Aruba tin un debe hopi grandi tambe cu nos a sali di Covid cu ne. E debe di Awg 900 miyon cu Aruba a presta di Hulanda. Gobierno ta buscando alternativanan pa e gastonan halto di awa y coriente. Gasolin a baha caba y pa awa y coriente lo mester bay den direccion di energia alternativa pa no depende di fuel.
Gobierno ta sigui baha gastonan di Gobierno drasticamente. Ta cortando den gastonan di goederen en diensten pa varios aña y Aruba ta e pais cu e gastonan aki mas abou den region. Asina mes Gobierno ta sigui baha nos gastonan y ta percura tambe pa cobra e impuesto cu mester cobra Gobierno ta hacienda lo posibel pa yega na e deficit cu mester y paga debenan di pais Aruba, Wever-Croes a señala.
Gobierno lo sigui den dialogo cu gremionan y Hulanda pa determina y yega exactamente con ta bay 'bridge e gap' cu Aruba ta aden aworaki. Hunto lo sigui traha pa yega na un solucion hunto cu participacion di e gremionan y e profesionalnan cu ta e ekipo di Minister di Finansas.
MENSAHE NA OPONENTENAN
Na final di e conferencia di prensa, Prome Minister Evelyn Wever-Croes a duna un mensahe general pa Aruba y oponentenan. “Nos a ripara cu nos oponentenan politico ta contra tur cos. Mi por imagina cu esey ta un estilo di hiba oposicion. Hasta nan ta contra cosnan cu ta bon y necesario pa nos pais. Pero loke mi no ta di acuerdo cu ne ta cu nunca nan ta bin cu un solucion.
E unico solucion cu nan ta bin cu ne ta pa lanta pueblo y baha Gobierno. Mi ta pidi oponentenan pa aworaki, Aruba por conta riba tur hende. Aruba tin mester di nos tur, di Parlamento, oponentenan, gremionan etc. Nos ta pasando den e dos crisisnan di mas pisa cu mundo a yega di pasa aden. Pues aworaki politica senciyo, politica barata no ta bay yuda Aruba bay dilanti. Bin cu bo solucionnan y hunto nos por bay traha na hiba nos pais padilanti”.
