E peso financiero y e peliger pa seguridad di entrada ilegal --- *Revelacion di ABV ta sostene e posicion di DIARIO den materia --- *E responsabilidad grandi di comunidad pa ciudadanonan anonimo
ORANJESTAD(AAN)—Uno di e decisionnan di Prome Ministro Evelyn Wever-Croes cu semper DIARIO a sostene, tabata e forma cu el a tene porta cu Venezuela cera hasta contra exigencia di Ministro Hulandes Stef Blok.
Ayera y awe, e condicionnan di bida cu Aruba conoce compara cu cantidad di paisnan den nos region, sigur ta atractivo pa hende cu ta pasa den situacionnan serio na nan pais.
E base constitucional di Aruba ta garantisa un sistema politico, cu no ta crea dictadura cu ta deshaci di e derechonan mas sagrado di hende.
E problemanan politico grandi na sigur Venezuela, caminda Chavismo a bira e dictadura di momento, a afecta bida di Venezolanonan cu mester a bandona nan pais mescos cu den pasado otro dictadornan a azota nan pais.
Mescos cu otro paisnan den region di Caribe, Aruba mester a tuma medida pa atende cu e salida di Venezolanonan, e Pueblo di un pais cu a naturalesa a entrega rikeza enorme.
Venezolanonan cu durante decada sesenta region di Caribe tabata atrae como turista cu tabata gasta fortuna durante vacacion, na careda mester a bandona nan pais y laga atras tur loke nan a traha duro pa construi.
Otro paisnan y islanan den vecindario di Aruba tambe ta victima di condicionnan na nan pais y na Aruba por a crea un porvenir nobo.
Pa un pais of persona por duna asistencia, e pais mester por ta capaz pa atende cu tur loke bienestar di un hende ta exigi.
Na prome lugar ta bini e seguridad di e pais, cu por wordo abusa dor di personanan of organisacionnan cu mal intencion.
E defensa di Aruba y e Arubiano contra entrada secreto di malhechor y banda, sigur ta un punto importante ora ta habri porta di e pais, cu no por perhudica su propio hendenan.
DIARIO semper a indica, cu Gobierno di Aruba na prome lugar mester defende interes di e Arubiano y garantisa cu e Arubiano no ta bira victima di loke ta solidaridad falso.
Na mes momento, Aruba mester ta capaz pa cubri e gastonan cu entrada ilegal ta forsa riba un comunidad.
Ora un persona drenta Aruba a base di areglonan legal, e interes di Aruba y di e persona cu ta drenta ta garantisa.
E persona mester tin e base necesario pa paga pa su vivienda, su costo di bida, su necesidad pa asistencia medico y hasta di recreo sano.
Mientras Aruba tabata tin placa, e por a asumi responsabilidad pa un grupo di migrante cu a huy di nan pais debi na circumstancia peligroso.
E situacion financiero di Aruba ta conoci dor di 2014 ora Hulanda a bin splica cu Aruba tin mas gasto cu e por paga.
Si Aruba a habri porta sin mas pa aumento di su poblacion, e pais lo tabata den un problema mucho mas grandi.
Durante e siman cu a termina, ABV a entrega Aruba un realidad importante cu nos a trece dilanti navarios ocasion.
Si un persona cu a drenta Aruba na forma ilegal, sufri di kebrante di salud, Aruba mester duna asistencia.
Aruba awor ta wordo presenta cu 3 Miyon cu anualmente mester paga pa cuido medico na hospital pa personanan cu no ta registra como habitante di Aruba. Na mes momento, AZV ta mustra cu e mester tuma medida pa sobrevivi y Hospital ta papia di medida pa falta di placa.
E berdad di cuido medico pa entrada ilegal, ta bini dilanti.Pero kico ta pasa riba tereno di vivienda? Kico ta pasa riba tereno social total?
Kico ta pasa cu e bienestar di Aruba, di e Arubiano, pero tambe di e persona cu ta anonimo pa hasta autoridad, cu mester sigura cu e no ta bira victima di delincuencia ni abuso?
Cada momento algo ta pasa na Aruba y na mundo. Asuntonan cu nos mester analisa y mester sigui atende pa asina por yega na solucionnan na interes di e ser humano, cu den e sistema democratico ta central!
