Gasolin na Aruba ta subi awe cu 30 cent pa liter

Prijs ta casi yega e barera di 3 Florin

ORANJESTAD (AAN): Basa riba e mercado mundial, entrante awe Diaranson 13 di April 2022, prijs di gasolin na Aruba lo subi bastante!

   Ministro di Asuntonan Economico a indica cu Gasolin Unleaded Premium lo subi cu 30,0 cent, pa wordo bendi awor na 291,0 cent pa liter.

   Diesel LS ta subi cu 45,7 cent, pa wordo bendi awor na 274,5 cent pa liter.

   Kerosin ta subi cu 43,9 cent, pa wordo bendi awor na 253,8 cent pa liter.

   Ya for di Diamars atardi caba y anochi, por a mira rij largo di auto cu a bay para na diferente gasolin station pa yena nan tanki.

   Con hopi e lo afectabo?  Ata algun ehemplo aki di autonan popular na Aruba.  Un Nissan March cu riba Diamars tabata yena cu 107 Florin pa full tank, entrante awe Diaranson e mesun auto ey lo bo tin di paga 119,30 Florin pa yen’e full.   Un Hyundai Santa Fe cu riba Diamars tabata yena cu 174,85 Florin, entrante awe Diaranson e mesun SUV aki lo bo tin di paga 195,00 Florin pa yen’e full.

   Prijs ta subiendo na algun pais mas tambe den Caribe.

   Jamaica: Gasolin a subi na e isla di Jamaica tambe.  Na comienzo di Januari 2022, tabata costa 2,34 Florin pa un liter di gasolin.  Esaki a subi cu 40 cent y dia 4 di April 2022 e prijs ta na 2,74 Florin pa liter.

   Republica Dominicana: Gasolin a subi na Republica Dominicana tambe.  Na comienzo di Januari 2022, e prijs tabata 2,33 Florin pa un liter di gasolin.  Sinembargo na comienzo di Maart el a subi cu 21 cent y yega na 2,54 Florin pa liter.  Aki Gobierno a ‘congela’ prijsnan pa 2 luna di tempo, y keto bay e ta na 2,54 Florin pa liter.

   Barbados:  Gasolin a subi na isla di Barbados tambe.  Na comienzo di Januari 2022, e prijs tabata 3,56 Florin pa liter.  Awor dia 4 di April 2022, e ta na 3,69 Florin pa liter.

   Cayman Islands: Na comienzo di Januari 2022, e prijs na Cayman Islands tabata na 2,50 Florin pa liter.  Awor dia 4 di April 2022, e prijs ta na 2,76 Florin pa liter.

   Costa Rica: Gasolin a subi na Costa Rica tambe.  Na comienzo di Januari 2022, e prijs tabata na 1,94 Florin pa liter.  El a subi y awor dia 4 di April 2022 e tabata na 2,47 Florin pa liter.

   Hulanda: E prijs promedio di gasolin na Hulanda na comienzo di Januari 2022 tabata na 3,87 Florin pa liter.  Na fin di Maart 2022 el a yega un piek di 4,63 Florin pa liter.

   Tur e prijsnan menciona aki ta na Florin Arubiano.