Un parti importante di inseguridad mundial ta wordo kita --- *Den recuperacion di turismo e ta un punto di gran importancia --- *E caracter temporal di e medida mester wordo bon splica na publico
ORANJESTAD—Baha prijs di gasolin pa un temporada dor di kita e peso di accijns, ta e decision cu Gobierno a tuma pa un temporada den e situacion mundial sumamente preocupante y insigur.
Ta trata di un decision cu sigur mester wordo bon splica na Pueblo pasobra entrada di accijns, di belasting, riba productonan petrolero ta un entrada importante pa Aruba, cu sin e entrada aki riba un termina indefini, sigur lo mester tuma otro decision.
Na e momentonan aki mester midi e entrada cu Gobierno ta ricibi di accijns y e entrada cu Gobierno lo no ricibi si prijs di productonan petrolero keda halto y Pueblo no tin placa pa entre otro dedica na loke ta cumpra cerca comercio, cu na su turno lo tin menos placa pa entrega na Gobierno como belasting.
Aruba no ta e prome pais ni e ultimo cu mester busca solucion pa Pueblo por paga pa su combustibel, cu ta dicidi pa e prijs di costo di bida.
Mientras prijs di gasolin ta sigui afecta e costo di bida na Aruba, e ta afecta tambe e placa cu comercio tin pa sigui haci comercio y den esaki nos ta tene na bista comercio grandi y personanan cu tin nan negoshi chikito.
Na e momentonan aki recuperacion turistico di Aruba ta di sumo importancia. Un recuperacion cu ta depende tambe di e prijs cu turistanan mester paga pa nan estadia na e pais.
Si prijs di transportacion ta sigui manda prijsnan di servicionan y productonan halto, esaki tin resultado pa turista, cu resultado atrobe pa e situacion financiero di Aruba y economia di e pais.
E anuncio na exterior cu Aruba ta baha su prijs di productonan petrolero sin duda lo anima e turistanan cu ta prepara pa bini Aruba, pero awor mester tene e placa cu nan por gasta tambe na consideracion.
E inflacion actual ta algo cu ta afecta henter mundo y for di e prome momento DIARIO a mustra riba e peliger cu e ta crea pa e turista cu ta bishita Aruba, sigur na un temporada cu normal ta trece ainda basta turista cu ta prome cu Pasco Grandi.
Pa Gobierno baha e accijns riba gasolin ta nifica, cu ta baha un entrada importante pero cu indirectamente a cuminsa baha pa loke ta trata e cantidad di placa cu Pueblo lo por paga na entre otro gasolin.
Ora tuma nota di e realidad di gasto na gasolin den publico na Aruba, por nota cu hopi hende a cuminsa tuma pasonan pa baha nan gastonan di transportacion pa asina baha e peso cu nan no por carga mas.
Manera ya a wordo bisa, mester splica bon cu aki ta trata un decision temporal mientras ta vigila e situacion internacional.
E situacion di confrontacion na Ukraine a continua pero paisnan grandi a cuminsa haci uzo di nan reservanan petrolero, loke a baha e demanda pa petroleo y asina a baha e prijs.
DIARIO ta sigui vigila tur aspecto den un situacion mundial sumamente dificil y insigur cu ta exigi pa gobernacion rond mundo mantene un grado halto di responsabilidad y di informacion na Pueblo cu mester carga e decisionnan.
