*Gas ta productor di hidrogeno cu ta parti di plan industrial Aruba
*Garantia di seguridad di Reino den diversificacion economico Aruba
ORANJESTAD (AAN) —Mientras mundo ta conoce uno di su momentonan mas critico, Aruba ta sigui crece y ta stabilisa su economia cu diversificacion industrial.
Un desaroyo cu mientras 2024 ta avansa, ta duna prueba di bon gobernacion di Gobierno Evelyn Wever-Croes sigur si tene cuenta cu diferente cambionan den e planificacion mundial, cu 2024 ta presenta.
Aña 2023 a cera cu uno di e evento internacional maximo, cu tabata e Conferencia di Clima, cu a conoce un fin na forma unico.
DIARIO a base di e desaroyo di e conferencia, a adverti su lectornan cu salida di gas y petroleo lo ta mucho mas dificil cu loke ta pensa.
Nos a cuminsa ilustra e cantidad di refinerianan cu ainda ta habri nan porta y e cantidad di exploracionnan cu ainda ta tuma lugar rond mundo, cu ainda no por substitui gas y petroleo..
Den seno di Reino Hulandes, Hulanda a continua cu exploracionnan.
E hecho cu na cierto partinan di Hulanda a stop cu boramento di gas ta debi na e drama cu e Provincia di Groningen sigur a conoce, cu temblornan ocasiona pa e hecho cu ta saca gas for di e suelo di e pronvincia, cu ta registra cantidad di cas di familia cu no por wordo habita mas pasobra nan fundeshi ta afecta.
Exploracion di gas den Noordzee ta continua.
Informacionnan cu awor ta alcansa mundo ta mustra, cu tur e medidanan cu cantidad di paisnan lo a tuma pa pone fin na azeta y gas, pa un parti importante, no a cristalisa.
Entrada di April, cu ta indica cu ta resta dos luna pa e prome parti di 2024 pasa pa pasado, ta wordo acompaña pa informenan oficial cu ta mustra cu paisnan cu tanto a papia di pone fin na e Era di Petroleo, awe ta gara na petroleo y gas como nan poder economico.
Aruba na e momentonan aki tin un acuerdo cu Eagle riba tereno di gas. Aruba ta traha riba e expansion economico cu hidrogeno, cu ta wordo produci for di gas natural den mayoria di caso.
Aki pues ta papia di dos proyecto pero tambe di e forma cu e dos proyectonan aki ta mara na otro.
Gobierno ta traha riba e proyecto pa e compania Armstrong por sigui traha riba exploracion di gas y petroleo den e subsuelo di Aruba.
Tres campo di gas a wordo reconoci pa Noord di Aruba, cu ta drenta un fase economico nobo den un situacion mundial sumamente interesante.
Guera ta continua cu un amenaza di hasta guera mundial na e dos paisnan asina importante pa industria petrolero, cu ta Rusia y Ukraine, cu tin sosten di otro gigante petrolero cu ta Merca.
Na mes momento, e centro petrolero di Medio Oriente tambe a bira zona di guera, cu ta afecta panorama economico mundial na diferente forma.
Facilidadnan petrolero na zonanan trankil manera e region Arubano, ta bira importante na un mundo, cu segun relatonan importante cu ta mira luz, no ta capaz pa deshaci di gas, cu mas y mas ta reemplasa e productonan mas pisa di petroleo y na mes momento ta fuente principal di hidrogeno, cu despues di cambionan den futuro, lo por wordo produci na otro forma pa cumpli cu e necesidad actual.
2024 lo bira sumamente interesante cu adaptacion di plannan riba tereno di combustibel den cual pasonan gradual lo ta e formula.
Teniendo cuenta cu e desaroyonan regional, Reino mester cuminsa atende cu expansion di su plan di seguridad nacional enfrente desaroyonan na nivel mundial, cu ta forma parti di e tareanan di Reino.
E diversificacion economico di Aruba lo haci e pais mas atractivo pa tur participantenan di economianan den problema, cu mester huy e realidadnan na nan propio pais den vecindario directo di Aruba.
Esaki ta nifica cu Reino Hulandes tambe tin un tarea adicional, pa percura mas cu nunca pa e integridad nacional di Aruba riba tur tereno den un mundo di problemanan cu ta afecta e ser humano y nacionnan.
