Descubrimento di vacuna contra Polio a pone fin na drama humano
*Palabra ta caba ora hende crea tragedia pa mucha inocente
ORANJESTAD(AAN)—Si na e momentonan aki autoridad medico internacional por a presenta prueba cu e vacuna di Polio ta peligroso pa mucha, sigur lo el a actua.
Sinembargo, no ta autoridad oficial ni personanan cu a studia materia medico, a bira fuente di situacionnan peligroso cu ta wordo crea contra hende.
Uno di e problemanan mas grandi cu mundo moderno conoce, ta e hecho cu hende ta entrega su mes y personanan cu ta depende di su persona, na sufrimento enorme cu no solamente ta unnecesario, pero tambe ta haya sosten creciente sin ningun prueba di veracidad.
Den e comunidad moderno di supuesto adelanto, e fayo mas grandi contra inteligencia ta wordo comete y ta haci mucha inocente cu no por defende nan mes contra decisionnan cruel di nan mayor, nan victima.
Ora Siglo 20 a haci su entrada na mundo, cantidad di habitante di mundo, lo a suplica pa nan por haci uzo di loke hende awe tin den su man, pa defende su mes contra entre otro crueldad di enfermedad.
Ora bolbe den historia, ta topa cu e victimanan di polio, uno di e malesananmas cruel cu mundo a conoce oficialmente na 1905.
Paralisis Infantil tabata e nomber original cu Poliomyelitis (Polio) a haya mientras e tabata ataca mucha inocente sin piedad.
Sobrevivientenan di Polio, mester a biba cu fayonan fisico enorme, cu a stroba nan desaroyo pero tambe a haci cu den cantidad di caso, nan tabata depende di aparatonan pa nan hasta hala rosea, cu a bira imposibel ora e malesa a ataca nan.
Awe, adultonan mayor rond mundo, ta conoci cu e resultadonan di e malesa ya cu rond mundo por a mira hende cu a wordo totalmente of parcialmente destrui dor di Polio.
Den e casonan mas leve un hende a keda manca, pero den casonan mas severo morto a sigui mientras tin persona cu no por a move partinan di nan curpa .
Con grandi e lucha contra Polio tabata, ta bini dilanti den e realidad cu ta na 1994 e region Americano a bira e prome parti di mundo cu por a wordo declara liber di e amanaza di Polio.
Uno di e logronan mas grandi di hende contra atake di enemigo, sin duda tabata e vacuna contra Polio, cu recientemente a bolbe wordo descubri.
Segun expertonan internacional na paisnan cu un grado abou di vacuna, e virus por cambia y asina bira un tipo cu por produci malesa y paralisis.
Un persona cu no a wordo vacuna dentro di algun hora, por bira paralitico si e tabata contacto cu un persona cu tin e enfermedad.
E enfermedad pa apodera di un persona cu ta perde su habilidadnan y por perde su bida.
Alarma ta wordo bati mundialmente pa cantidad di mayor cu ta nenga di vacuna nan yiu contra e enfermedad y asina ta habri caminda pa horor di e enfermedad, pa cu na 2023 mundo lo a eradica.
Futuro di mucha ta den man di adultonan mientras mundo medico ta sigui traha riba adelanto cu mester evita drama.
Enfermedadnan serio a wordo eradica dor di Cuido Medico. Awor ta deber di hende pa sigui proteha su mes y muchanan y no participa na storianan cu por destrui hende y sigur mucha inocente, cu no por dicidi pa nan mes.
Covid-19 a haci cu a surgi un retrazo den e programanan di vacuna, cu awor ta wordo atendi y cu mester di sosten di tur hende pa defende humanidad contra drama doloroso.
.
