Ganadornan di e campaña ‘Back to school’ cu MEP a ricibi nan premionan

Partido MEP ta desea un y tur un felis comienso di un aña escolar nobo

ORANJESTAD (AAN):  Diamars atardi, Partido Movimento Electoral di Pueblo (MEP), a haci entrega di loke ta e premionan di e campaña di "Back to School". Pa stimula nos muchanan pa cu e aña escolar nobo, partido MEP a lansa e campaña "Back to School" pa duna oportunidad na e muchanan di scol pa gana diferente premio pa por adkiri material y/of uniform di scol. 

            Pa por participa, e muchanan mester a graba un video di 15-30 seconde splicando kico nan ta gusta di scol. E reaccion pa cu e campaña aki tabata positivo, na unda por a nota den e videonan, e enthusiasmo di cada mucha.  

            Dia 10 di Augustus, Partido MEP a anuncia e 4 ganadornan di e campaña aki. E prome premio ta AWG. 500,- na material di scol y e di dos premio ta AWG. 150,- na uniform di scol. E premionan a ser entrega, diamars atardi na cede di MEP, pa Presidente di Partido MEP Ricky Hoek y candidato Michella Steenvoorde-Lacle.

            E ganadornan di e campaña aki tabata, Abigail Suleny Cortes y Aly-Jean Vrolijk cu a ricibi AFL.500,- na material di scol, y Rajiv Hernandisy y Rushen Faria cu a ricibi AFL.150 na uniform pa scol. Ganadonan a ricibi un cadeau bon di e suma menciona.

            Partido MEP ta felicita e 4 ganadornan, y ta gradici nan pa a tuma parti den e campaña aki. Educacion ta un pilar importante, y pesey ta esencial pa bin cu diferente campaña, pa encurasha y stimula nos hobennan pa haci nan best na scol, pa asina nan por tin un miho futuro.

            Tambe, partido MEP, kier a desea tur e muchanan hopi exito pa cu e aña escolar nobo. Danki na un y tur cu a mandanan video y keda pendiente pa mas campaña cu MEP riba medionan social.