Ganadora Elizabeth Johnson cu hopi plan caba pa ta un voz pa hubentud di Aruba

ORANJESTAD (AAN): Diadomingo anochi, Elizabeth Johnson a wordo corona como Miss Teen Aruba International 2021. 

   E tabatin mas fanatico presente den Cas di Cultura, y nan tur a bira loco ora cu a anuncia cu e ta e ganador.

   Na final nan tur a subi escenario pa asina saca potret cu Elizabeth, y felicita e mayornan, y tambe e preparador y diseñador Edgar Kock.

   Elizabeth mes tin 19 aña di edad, y den un entrevista cu DIARIO na final di e certamen el a bisa cu e ta sinti su mes orguyoso di tur e team, tur hende cu a yude, specialmente su preparador Edgar Kock, esun cu a haci su cabey, make-up, e ta hopi agradecido na nan pa e trabao duro cu a wordo haci pa asina logra nan meta.

   SU PARTICIPACION:  Pero kende realmente a pusha Elizabeth cu e idea pa e participa den un certamen?  Segun Elizabeth, den pasado nunca el a yega di participa den certamen, y tampoco eleccion di reina pa Carnaval.  Unico evento competitivo tabata den competencia di core cabay den exterior, y tambe “Aerial Silks”.

   Pero el a splica cu e tabatin hopi hende cu tabata dune conseho pa e participa pa un certamen.  Segun Elizabeth, e ta algo cu semper e tabata corda riba e stereotipo cu tin pa cu certamen, esta cu e ta bay djis pa beyeza fisico y nada mas.

   Toch hunto cu e preparador Edgar Kock, el a tuma e corahe pa inscribi y participa, y mira pa su mes kico un certamen ta encera.

   “Tin hopi mas preparacion ta bay su tras, cu djis su beyeza,” Elizabeth a indica na DIARIO. E certamen ta encera mucho mas aspecto, segun el a mustra.

   “Awor cu mi a participa, mi ta realmente hopi agradecido y mi ta consider’e como un experiencia inolvidable,” el a bisa.

   SU TITULO: E anochi aki, Elizabeth Johnson a gana no djis titulo di Miss Teen, sino tambe titulo di Miss Teen Popular, y tambe Miss Teen Best Makeup.

   DIARIO a puntre, kico e lo haci awor cu e tin un corona y un titulo ta carga.  Aki mesora Elizabeth cu un cara serio a contesta cu e ta bay haci uso di e plataforma aki di Miss Teen Aruba International y su titulo, pa por ta un voz pa tur hobennan di Aruba.  Por a nota cu e ta decidido riba su plannan pa asina demostra cu e certamen no ta djis algo di beyeza, sino tambe algo pa duna bek na comunidad y yuda hubentud.