ORANJESTAD (AAN): Riba Diahuebs, e persona cu a gana e jackpot di Lotto di Dia cual sorteo tabata 20 di Mei 2023, a presenta na oficina di Lotto na Playa pa reclama su premio.
E sorteo di 20 di Mei tabatin como numbernan ganador: 01, 16, 24, 27, y 29.
A resulta cu Blanca tabatin tur 5 number bon, pues el a gana e jackpot. Un ganador tin 90 dia di tempo pa bay reclama su premio.
Pues ainda cu hopi tempo na su disposicion, riba Diahuebs cu a pasa, Blanca a yega na oficina di Lotto cu e ticket. Aki e funcionarionan di Lotto a revisa e ticket, y ora di scan e barcode, e computer a confirma cu Blanca a gana 51.000 Florin cu Lotto di Dia.
Mesora a sigui cu e proceso pa transferi e premio electronicamente pa su cuenta di banco. Blanca a indica cu e ticket ganador a wordo cumpra na Bon Suerte Lottery.
