Mike Eman, Lider di Partido AVP:
ORANJESTAD (AAN)—E lider di Partido AVP, señor Mike Eman, den entrevista cu DIARIO a referi na un speculacion cu tin den pueblo, cu su persona ta hopi “malcria” y kier tur e carteranan, y p’esey e proceso di formacion di gobierno ta tarda.
El a toca e tema pa contesta un pregunta cu el a haya di prensa. El a contesta cu enberdad tin hopi speculacion, y di tur dos banda nan a scucha cu comunidad ta specula si ta FUTURO ta pidi hopi, of si ta AVP ta pidi hopi.
“Locual nos ta haci ta cana un proceso pa tin siguranza cu di tur dos partido, ta comparti temanan cu nan ta considera hopi importante pa loke ta nos programanan di gobernacion, locual ta nos pensamentonan por haya un refleho tambe den e reparticion di cartera, y nos a inverti hopi tempo den esaki, nos tin un base di confianza hopi fuerte, pa tur hende cu ta drenta den e gobernacion aki, cu e sosten di nan partidonan, cu’n animo hopi, hopi grandi pa traha, pasobra nan ta reconoce nan mes den e forma cu a haci e reparticion aki”, señor Eman a expresa.
El a reitera cu nan a traha riba un base di confianza hopi grandi pa nan por continua awo cu e siguiente fase, cu ta busca e candidatonan y tambe pa consolida e programa di gobernacion.
El a señala cu hopi di e temanan nan a repasa nan tambe, y durante e proceso di papia e carteranan nan ta wak kico pa cada partido ta pisa como puntonan di prioridad. “Y esey a haci cu nos ta hopi leu na e momentonan aki di por sinti otro, di por tin confianza di por bay traha cu otro y por logra un gabinete di coalicion cu por yega su final”, señor Mike Eman a declara.
El a señala cu nan no a yega na reparticion di cartera ainda; esey ta un proceso interno di partido, y mescos cu ora traha un lista esaki tin su retonan cu ne. “Pero den Partido AVP y mi ta kere mescos den FUTURO, tin un sentimento hopi importante cu ta momento pa Aruba haya un Gobierno stabil. Tin un pobreza grand den nos comunidad, e perdida di poder di compra tabata enorme e ultimo siete añanan, Aruba ta anhela un direccion cu ta bay tene cuenta cu e dolornan cu ta bibando. Nos ta mira decisionnan cu gobierno ta tumando e momentonan aki, tampoco ta yudando e proceso ey. Kiermen, nos ta haya hopi importante pa e gobierno nobo sinta rapidamente, y esey lo cambia e direccion di enfasis manera cu Gerlien a bisa tambe, caminda cu nos a wak e crecemento economico so, pero con nos a reparti esaki pa yega na cada hogar na Aruba ta haci hopi falta na e momentonan aki y esaki lo ta un contribucion hopi grandi di e Gobierno di AVP cu FUTURO, e forma diferente di wak e economia di Aruba no solamente cifranan di crecemento di turismo, economia, pero con e ta yega e ciudadanonan, na nos pensionadonan, esnan di menos recurso, esnan di salario minimo. Nos ta sinti cu e comunidad ta na spera di un mehoracion pa e gruponan specifico aki, hopi rapido. Y den esey FUTURO cu AVP sigur ta haya otro”, e lider di Partido AVP a enfatiza.
Mike Eman a informa cu diamars 18 di Februari ambos partido lo ta atrobe cerca Gobernador, pa bolbe duna un adelanto con leu nan ta yega y desde dialuna 17, prensa lo haya e programa di e Formadornan, unda cu nan lo ta den consulta cu e gremionan di nos comunidad.
