Futuro ta bay depende di e capacidad di nos mucha- y hobennan pa educa nan mes digitalmente

Ministro Glenbert Croes

ORANJESTAD (AAN): Durante Rueda di Prensa di Gobierno, Minister Glenbert Croes na ocasion di reapertura di Enseñansa pa Empleo, ademas di anuncia Enseñansa pa Empleo San Nicolas, a elabora riba un proyecto dirigi riba mucha- y hobennan cu su Ministerio tin ya dos aña trahando riba dje silenciosamente.

   E proyecto aki ta dirigi riba capacitacion di nos mucha- y hobennan di entre 7 y 17 aña riba educacion computacional y inteligencia digital. Educacion digital di nos hobennan ta sumamente importante pasobra economia di futuro di nos pais ta bay depende di e capacidad digital di e muchanan di awe cu ta e adultonan di mañan.

   CoderDojo: CoderDojo ta un movimiento global di clubnan di programacion gratis, habri, guia pa voluntario (Dojos) unda hobennan di edad 7–17 (Ninjas) por explora tecnologia digital. Mision di CoderDojo ta pa duna hobennan rond di mundo e oportunidad pa siña programa den un ambiente social y sigur.

   Ta importante pa Aruba tuma e pasonan necesario den educacion computacional, enfatisando e importancia di un cuadro unifica pa fomenta inteligencia digital. Hunto, nos por empodera e scolnan y centronan di Aruba, fortifica colaboracion global y avansa educacion computacional.

   Adoptando Clubnan di Codigo/Dojos rond di Aruba ta yuda sigura un futuro unda conocimento y habilidadnan computacional ta accesible, interconecta, y adaptable na e campo cambiante di tecnologia. Esaki ta posibel danki na Utilities Aruba cu ta sigui cu accionnan real den impacto social y sostenibilidad.

   E futuro di zero emision ta briyante, tanto cu nos sigui crea ciudadanonan digitalmente inteligente, proteha metanan di desaroyo di Aruba y garantisa nos participacion den e economia sin frontera nobo combina cu e industria creciente di energia renobabel.