Parlamentario Evelyn Wever-Croes
- Nan a permiti Hulanda recolonisa Aruba
ORANJESTAD (AAN): Mirando e acontecimentonan recien, ta bisto cu partido Futuro su nomber real ta AVP 2.
Parlamentario Evelyn Wever-Croes a splica di con, pasobra hopi ta esnan cu ta puntra nan mes; con e partido aki por a actua den sincronisacion cu AVP y permiti Hulanda re-colonisa Aruba, mescos cu AVP a permiti den pasado?
E ta di lamenta cu pa haya fabor financiero, tur dos partido ta dispuesto pa bende patria. Y esaki ta e motibo pakico Juancho Irausquin y Betico Croes a bandona e partido aki den pasado. Betico a tuma over cu curashi y no cobardia e lucha di Aruba di separa di Curaçao y Antillas pa asina enfrenta Hulanda pa logra Status Aparte. El a hiba un lucha incansabel, cu alfinal tabata tin su frutanan valioso pa pais Aruba.
Na momento cu Lago a dal sera y un crisis economico a golpia Aruba, Betico no a resigna. E tabata sa cu e Status Aparte y Aruba su libertad y hermentnan financiero y economico lo bay sirbi e pais aki pa supera y logra. Y awe mas cu nunca esey ta evidente.
Cu e rijkswet aki, partido Futuro a hiba Aruba back pa pasado, cu e politica entreguista di AVP, sacrificando nos dignidad como pueblo pa presion y fabor di Hulanda.
E hecho aki ta uno di lamenta, y lo ta na bienestar di pais Aruba pa ambos partido tene honor na nan mes y baha como gobierno.
