ORANJESTAD (AAN): Durante aña 2005 su nomber tabata wordo hopi menciona na Aruba. E fundador y director di e organizacion di buskeda, esta Texas EquuSearch, pues Sr. Tim Miller
a wordo hospitaliza Diasabra siman pasa na un Hospital na Houston debi na un condicion serio di salud.
Riba social media, Texas EquuSearch a indica cu ya caba Tim Miller a pasa den un operacion, y tin di bay ricibi uno mas. Despues di esey e lo tin di bay descansa pa asina recupera. E organizacion a bisa cu nan ta spera cu Tim Miller lo ta bek y trahando pronto atrobe pa yuda famianan haya hendenan perdi.
Texas EquuSearch ta un di e gruponan lider cu ta traha pa yuda localiza hendenan perdi den area di Houston na Texas. Miller a lanza e organizacion despues di e desaparicion di su yiu muher Laura. Laura a wordo secuestra y mata den parti di condado di Galveston na 1984. El a bisa cu e morto di su yiu a dune inspiracion pa yuda otronan.
Desde 2000, Texas EquuSearch ta envolvi den casi 2.000 buskeda den henter Merca, como tambe el a bin yuda busca Natalee Holloway na Aruba, y tambe hendenan na Sri Lanka, Mexico, Jamaica, Republica Dominicana, y Nicaragua.
Nan esfuerzo di buskeda, a yuda nan logra exito di trece 400 hende perdi bek pa nan famia, y a haci esey na tempo pasobra algun di nan tabata casi perde nan bida.
Texas EquuSearch ta responsable tambe pa recupera e restonan mortal di 238 persona perdi, pa asina famianan haya trankilidad cu nan ser keri a wordo haya toch. Hopi di e casonan ey a finaliza den investigacion criminal.
