ORANJESTAD (AAN): Sociaal Crisis Plan ta den su ultima fase pa finalisa cu e prome raportahe di aña 2021.
E raportahe aki ta tuma luga tur aña y ta cubri tur desaroyo di tur socio y tur proyecto activo. No obstante e pandemia di Covid-19 a logra acumula tur informacion pa asina por finalisa esaki.
Sociaal Crisis Plan y hunto cu tur socio ta trahando diligentemente na e sistema nacional di proteccion di tur mucha na Aruba. Un di metanan primordial den e programa di Sociaal Crisis Plan pa Bureau Sostenemi y Directie Voogdijraad, cu ta atende cu casonan di posibel abuso di mucha y hoben, ta reduci nan lista di espera.
Pa por a yega na e resultadonan mester a adkiri personal professional pa por a atende cu casonan cu tabata riba lista di espera. Despues trabaonan incansabel ambos socio a logra nan meta cu resultado significante!
Bureau Sostenemi a reduci nan lista di espera di 381 caso pa 56 caso, actualmente y ta premira cu pa luna di juli 2021 e casonan aki lo wordo kita for di e lista por completo. Esaki ta un reduccion di 85% di caso cu tabata riba lista di espera. Ademas, ta trahando ariba tur casonan cu tin un retraso administrativo pa asina completa e lista aki den luna di juli venidero.
Bureau Sostemi a experiencia algun cambio den aña 2020 y ta trahando mas eficiente caminda raportahenan ta wordo procesa den 5 dia di trabou. Esaki ta pone cu no tin lista di espera mas.
Na Directie Voogdijraad a observa e mesun desaroyo caminda reduci e lista di espera for di 116 caso pa 60 caso, un reduccion di 46%. Alabes a cera un total di 357 caso na fin di aña 2020. No obstante cu a perde algun personal den servicio a logra nan meta pa reduci e cantidad di caso riba lista di espera.
