Fundacion Zinnia ta cumpliendo dies aña di a wordo lanta door di un situacion doloroso

Awo cu campaña den un bachi nobo

ORANJESTAD (AAN:) Fundacion Zinnia a cumpli recien dia 2 di November, nan di 10 aniversario di a wordo funda. El a nace di un situacion hopi doloroso, cu pueblo di Aruba sigur hamas lo lubida. Pero di algo malo a saca algo bon, y esaki ta e Fundacion cu ta concientiza comunidad riba e peligro di stuur bao influencia di alcohol y su consecuencianan.

   Matutino DIARIO a entrevista señora Michelle Croes, Directora, ken a duna di conoce cu Fundacion Zinnia tin un bachi nobo y nan a tuma Amigo Didi completamente over, y el a bishita DIARIO pa presenta e proyecto nobo di e fundacion cu ta cay bao e capa di Amigo Didi.

   “Mi ta biba na Hulanda pero aki na Aruba tin un team cu ta ehecuta e trabaonan di Fundacion Zinnia. E proyecto ta un ‘breathalyzer’ pa uso di un persona cu a consumi bebida alcoholico supla. E ta un instrument chikito cu por tin’e den e tas, den auto, y por tin extra pa duna otro personanan. E ta bin cu e instruccionnan con pa uz’e”, señora Croes a indica.

   Campaña: Diabierna cu a pasa, Fundacion Zinnia a cuminza su campaña cu un conferencia di prensa, en conexion cu e Dia Internacional di Victimanan di Accidentenan den Trafico.

   “E campaña ta bay dura tres luna largo, durante e temporada di Pasco y Aña Nobo cu tin hopi fiesta, cu comemento, y hende cu gusta dal su drinks, y den temporada di Carnaval. E Fundacion lo bay ta riba caya partiendo e Breathalyzer, y esaki ta completamente gratis”, el a agrega.

   Tambe nan lo presenta den diferente actividad na December. E campaña aki ta sponsor door di New Indian Insurance, Boticanan di Servicio y KPA. Fundacion Zinnia ta bay tin control hunto cu KPA.

   “Por haya e Breathalyzernan den Boticanan di Servicio tur cuater localidad y nos, di e Fundacion, tambe lo parti nan den cierto lugarnan”, Michelle Croes a comenta.

   Algo hopi interesante ta cu na 2026 Fundacion Zinnia y Amigo Didi lo drenta scolnan.

   Señora Michelle Croes a expresa e siguiente palabranan, como mensahe: “Cada accidente causa door di consumo di alcohol ta di mas! Corda cu semper tin un hende wardando pa bo na cas, mescos si tin victima inocente.

   “Fundacion Zinnia ta spera cu pueblo di Aruba acepta esaki masalmente y hunto, nos por yuda otro y ta conciente. Si bo ta stuur no bebe, si bo ta bebe no stuur, y si bo ta stuur y a bebe prime e #AmigoDidi su hashtag”, el a conclui.