ORANJESTAD (AAN) – Shurman Milliard, director di Fundacion Telefon pa Hubentud, ta comenta cu e fundacion pa hopi aña caba ta trahando riba diferente proyecto pa e necesidad di comunidad y e hobennan.
Milliard a señala cu e Fundacion ta haya cada bez mas cooperacion na Aruba, mayor, profesionalnan, y naturalmente cu e muchanan di hopi tempo caba a cu nan por yama na telefon conoci (131) entre 2 or y 6 or di atardi.
El a agrega cu door di e proyectonan cu ta bay asina leu y bon traha y cu nan ta evalua cual ta e consecuencianan di proyectonan y kico e fundacion ta logra, internacionalmente nan ta haya hopi pedido pa duna diferente charla. Nan ta duna charla den nos comunidad pero tambe na otro paisnan.
Shurman a splica cu, cu e Proyecto Stop Termento, cinco aña pasa el a bay Bonaire pa directivanan di scol haya e oportunidad pa nan tambe haya e proyecto aki.
Na Aruba mes a hacie bao 45 diferente scol caba, cu ta un cantidad hopi grandi y cu ta keda crece tur aña. Pero na e momento aki FTPH a haya un peticion “Bijzonde Gemeente” di Hulanda pa duna e proyecto “Stop Termento” na tur scol, y tambe traimerdia, entre otro.
E lo haci un bishita di 12 dia na Saba pa comparti e proyecto na scolnan na unda Shurman mes lo duna les na seis diferente grupo, pa asina nan tambe por bay den nan sociedad y termento stop aya, mescos cu a logra reduci'e na Aruba.
El a agrega cu banda di esey FTPH ta yudando casi un aña y mey caba e Isla di Saba pa nan cuminza tambe cu nan Fundacion Telefon pa Hubentud. El a bisa cu e fundacion sa cu door di Derechonan di Mucha tambe, e ta un derecho di mucha pa e por expresa su mes, papia, y por haya informacion y guia di un profesional adulto. Pesey, FTPH ta haciendo esaki na un forma anonimo pa 21 aña caba y pesey Hulanda, Saba y Sint Eustatius kier algo asina tambe.
Dia 20 di Juni, den presencia di FTPH Aruba, na Saba lo lanza e number di telefon di nan fundacion (918) despues cu Sint Eustatius a hacie un par di luna pasa. Kiermen Saba tambe lo haya e servicio pa yuda e muchanan na un forma confidencial y asina Aruba por yuda su islanan ruman tambe. Milliard a expresa cu e ta hopi orguyoso di por haci algo asina, pasobra no solamente e fundacion tey pa yuda nos muchanan di Aruba pero esey ta nan “core business” cu hopi amor y sosten di comunidad.
