Fundacion Snoop Doggy a bishita Maria Gorreti College pa haci entrega di nan buki

ORANJESTAD (AAN): Diamars mainta Minister Arends hunto cu Fundacion Snoop Doggy a bishita Maria Gorreti College pa haci entrega di nan buki “Snoop Doggy vindt een huisje”.

Un proyecto cu a cuminsa ya di aña pasa pa educa nos muchanan di 3de klas ariba e diferente aspectonan importante tocante cuido di mascota. Fundacion Snoop Doggy a bin ta reparti e buki na diferente scolnan na Aruba pa e aña escolar aki. 

Durante e bishita a duna presentacion interactivo cu ta toca e topico di cuido, entre otro con pa maneha carpata, cuminda diario, microchip, ehercicio, higiena y e sensitividad di oido di mascota ora ta trata klapchi. Hunto cu e team di Fundacion Snoop Doggy, muchanan tabata tin e oportunidad pa conoce un miembro special cu tin rabo y ta cana riba cuater pata, Rohan.

No tin duda cu e muchanan di Maria Gorreti College a disfruta enormemente durante e bishita di Minister Arends y Fundacion Snoop Doggy. Nan a participa cu gran entusiasmo den e presentacion interactivo, haciendo pregunta mientras un demostracion di conpa lesa microchip di mascota.

Ta importante pa nos crea un sociedad unda doñonan di mascota ta mas responsabel. Evalua bo situacion bon prome cu busca un mascota nobo pa asina preveni e situacion caminda no por sigui provee cuido pa nan. Hunto nos por traha pa crea un Aruba unda nos ta conoci no solamente pa nos hospitalidad, sino tambe pa nos respet pa tur ser bibo, incluso esnan cu no por papia.

Minister Arends ta sumamente contento di forma parti unabes mas di e reparticion di buki di conscientisacion. Educacion den e area di bienestar y cuido di animal ta algo cu Ministerio di Naturalesa a bin ta traha duro ariba dje, cual ta inclui e introduccion di material di scol. Conhunto cu proyectonan di conscientisacion, e buki di scol “Mi Mascota ta mi Responsabilidad” lo ekipa nos futuro generacionnan cu norma y balor cu lo transcende mas aya cu awo cu nan ta mucha pero den futuro ora nan bira adulto responsabel den nos comunidad.

Palabranan di elogio y gradicimento pa tur fundacion, departamentonan y companianan cu ta contribui grandemente na proyectonan pa bienestar di animal na Aruba. Esfuersonan conhunto lo asegura un comunidad cu mas empatia pa nos animalnan. Bo cuido y amor ta haci tur e diferencia den un mascota su bida. Stima bo mascota!