Fundacion Siñami Paso pa Paso ta celebra 15 aña di existencia

ORANJESTAD (AAN):  Dia 7 di Mei 1999, Lic. Maria Cristina Harsveld, Logopedista a establece oficialmente Clinica Integral di Logopedia Aruba.

Durante añanan a mira e necesidad pa ofrece mas servicio den forma integral pa beneficia persona cu algun discapacidad y nan famia.

            Como respuesta na e necesidad pa ofrece mas servicio den forma integral, dia 6 di April 2009 a wordo stableci oficialmente Fundacion Siñami Paso pa Paso Aruba, cu e meta pa duna orientacion y guia integral di diferente disciplina pa beneficia mucha, hoben y adulto cu algun discapacidad y nan famia.

            Durante e periodo di 2009 pa 2024 Fundacion Siñami Paso pa Paso Aruba a ofrece servicio di Psicologia, logopedia, terapia educativo, tayer di arte y psico-educacion pa mayornan.

            Tambe a ehecuta exitosamente algun proyecto cu a beneficia e grupo di meta y nos comunidad. Algun di e proyectonan ta: guia profesional, eco-pasco, guia pa mayornan 1 Ki ora mester bay un psicologo, 2 Un boca sano pa henter bo bida, 3 Kico ta motorica?, 4, Habla y lenguahe di 0 pa 12 luna, 5 Habla y lenguahe di 1 pa 2 aña, proyecto intergeneracional, tienda mobibel, stimulacion trempran, proyecto pa muchanan cu discapacidad intelectual leve, proyecto pa hoben cu discapacidad intelectual leve, proyecto buki di balor un tesoro pa mi bida, programanan di boluntariado, ferianan di salud y informacion entre otro.

            Tambe a logra cera algun acuerdo y convenio di cooperacion cu algun instancia local y internacional, esaki pa por ofrece un servicio di calidad halto y ta na haltura di e avancenan cu lo beneficia nos grupo di meta y nan famia.

            Den actualidad Fundacion Siñami Paso pa Paso ta sinti orguyoso di e sosten y confianza cu ta wordo ricibi door di nos comunidad y door di algun instancia / organisacion local y internacional, tambe di por conta cu un directiva y team boluntario cu ta consisti di profesionalnan den e area di; medicina, psicologia, logopedia, neurociencia organisacional y educacion. Sra. Maria Cristina Harsveld, Sra. Eva Rusz, Sra. Tiara Calvo, Sra. Yazxuly Toyo, Sra. Angelica Ayala, Sra. Rubiela Gracia y Sr. Carlos Falla.

            Tambe ta un placer pa nos por traha conhuntamente cu algun instancia / scol cu ta pidi nos servicio profesional pa nan cliente / alumno cu tin un retraso den nan desaroyo of un discapacidad intelectual leve y lo mester di un tratamento corto “ terapia” of un guia; coaching, mentoring, training, counseling pa un periodo mas largo.

            Den futuro cu e sosten di nos comunidad y stakeholders  lo sigui duna servicio profesional

specialmente na e grupo vulnerable di mucha, hoben y adulto cu tin un retraso den nan desaroyo of tin

un discapacidad intelectual leve y ta forma parti di e grupo “ lage sociaal economische status Lage SES”

Tambe  a cuminsa traha riba algun acuerdo / proyecto pa amplia nos servicio den forma structural y

gradual, esaki teniendo na cuenta e gran demanda cu nos ta ricibi for di e comunidad pa ricibi ayudo

integral. 

“ ATENCION INTEGRAL PA UN MIHO FUTURO “

            Den conexion cu nan 15 aniversario, den e luna di Agustus / September 2024 lo bay introduci e buki di balornan “ Un tesoro pa mi bida” esaki lo bay wordo parti na algun scolnan y centro di bario. Kier a duna un danki na e comerciantenan y organisacionan cu ta colabora cu e buki.

            Pa finalisa kier a duna un danki special na e comunidad di Aruba, nos clientenan, team profesional boluntario, American University School Of Medicine Aruba (AUSOMA), CEDE Aruba, SABA y Samenwerkende Fondsen Cariben pa e sosten ricibi durante añanan.