Norman Thijsen, Presidente:
ORANJESTAD (AAN) “Nos ta agradecido, e ta un bendicion cu nos a haya apoyo di comercio, y mi ta kere cu den transcurso di tempo nos a bin demostra cu Fundacion ta serio, y cu nos ta trahando p’e comunidad di Savaneta, nos ta cumpliendo, y e ora ey sponsors tambe ta wak bo trabao”, e presidente di Fundacion Savaneta Prome Capital, señor Norman Thijsen a expresa, den entrevista cu Matutino DIARIO, pa referi na e respuesta di colaboracion cu e fundacion ta ricibi.
“Mi ta kere cu esey ta importante, nos ta cumpli cu loke nos ta bisa cu nos bay haci, pero lo mas importante ta e boluntarionan. Sin e boluntarionan bo no ta logra. Nos tin un mix di comercio cu ta yuda nos y nos tin un cuerpo di boluntario cu ta basta grandi. Ora nos ta haci Aruba Doet, por ehemplo, riba cien boluntario ta aplica cerca nos. Asina ta cu nos ta un fundacion hopi activo, y yamativo pa otronan cu kier doemee cu nos, nos ambiente ta hopi atractivo, hopi hende ta gusta bin cu e ambiente pasobra nos ta haci algo hunto, y esey ta e spirito cu bo tin cu manda den comunidad, pa haci algo hunto, pa bo bario, y den e caso aki ta specifico pa Savaneta”, señor Thijsen a expresa.
Biniendo bek na e tema di e parada, Norman Thijsen a bisa cu esaki ta un parada cu a nace tres aña pasa, y enberdad tabata solamente un parada di asambeho di brass band. “Nos no ta pone banda, pasobra e ora ta mescos cu tur otro evento, y nos kier haci algo exclusivo, diferente, otro ambiente”, Thijsen a indica.
El a agrega cu na a haci e ruta, e aña aki, un tiki mas largo, cu hende por disfruta un tiki mas, pero e ta riba strep di e caminda di lama; strep di Zeerover. “Mi kier menciona aki, cu e fundacion mes, no tin grupo di su mes, e ta parti di e gruponan di e comunidad di Savaneta, manera San Luis, La Fama, pero e aña nos a invita Funari, pa ta hunto cu nos cu nan electric wheelchairs, nos ta regala nan flanel, pa nan tambe ta parti di nos comunidad y nan ta bay ta parti di e Parada di Mascarada”, Norman Thijsen a duna di conoce.
El a menciona cu nan ta bay tin entre 200 cu 300 participante cu ta bay ta riba caya, parti den tres brass band grandi, tin dos scol, Scol Prome Paso, lo tin un mobile DJ, cu lo yuda cu extra musica.
