Norman Thijsen ta relata:
ORANJESTAD (AAN) – Diabierna 14 di Februari, Dia di San Balentin, Fundacion Savaneta lo ta cla pa momento cu e parada ta bay sali.
Norman Thijsen, presidente di e Fundacion, a comenta, den entrevista cu DIARIO a splica cu aña pasa tabata pa prome biaha cu nan tabatin e parada, y e idea di e Fundacion ta trece tur cos cu tabatin e balor di antes y cu awo no tey mas.
El a menciona cu e jump up di añanan 80 pero e no ta existi mas. Nan a trece bek, pero cu otro caracter, el a bira algo visible, un parada di mascarada, visibel, cu t-shirt.
Thijsen a agrega cu nan ta duna empuhe na e muchanan di brass band, cu ta e asambeho. “Nos parada ta e unico na Aruba cu ta solamente brass band, kiermen, aki nos ta duna nos contribucion pa duna atencion na e brass bandnan cu awendia a baha un poco”, el a bisa.
El a añadi cu e brass band na añanan 80 tabata hopi popular, e ta e decada mas activo na aruba pa loke ta brass band, y nan a logra trece bek casi tur e muchanan, cu awendia ta hende grandi, y pa e aña aki, nan ta subi caya. Aña pasa nan a haci un presentacion chikito na Centro di Bario. Nan a entrena full e aña, y nan lo ta saliendo di akinan y Savaneta Brass Band lo ta e ultimo cu ta cera e evento. El a duna di conoce tambe, cu tin gruponan nobo cu ta bay participa y e idea ta pa mantene e gruponan di Savaneta.
Nos ta habriendo frontera unda cu nos tin bon cooperacion Fundacion Chico Harms di Brasil, cu ta hopi popular den e parada cultural y nan lo tey presente, Gucci Dancers tambe. Nos ta habriendo frontera den nos area di bario y tur hende ta bon bini”, Norman Thijsen a relata.
Lo participa tambe e Reinanan di Savaneta, Prins cu Pancho, señora Carnaval den su convertible, Chaz Models, Level up Branss Band, San Luis Dep, Bar San Luis, DJ Wheelz, Happy Group Maristella, Stingray Group.
