Rudy Leysner, fundador di FMTB:
ORANJESTAD (AAN)—Den cuadro di e 15 Aniversario di Fundacion Movimento ta Bida, celebra dia 10 di Februari awo, su Fundador señor Rudy Leysner a expresa, den entrevista cu DIARIO, cu nan mester forma lider.
“Nos kier lidernan boluntario. Mi mes a weita den e Misa, cu e forza di Fundacion Movimento ta Bida ta e boluntarionan. E boluntarionan ta esnan cu ta traha den e gruponan, dus nos mester forma lidernan cu kier forma gruponan como di amigo, den e bario, etc., p’asina aki nos por haya e grandinan mas activo. Mi ta kere cu den e caminda ey no mester bay”, Leysner a expresa.
El a agrega cu naturalmente e fundacion mester fondonan pa capacitacion, pasobra nan no tin hende specializa pa traha cu hende grandi, vooral instructornan.
El a comenta cu na 2016 nan tabata tin un curso den cual 41 hende a participa. Nan a busca hende di pafo y mester bin bek riba e parti aki, pasobra e fundacion tin falta di hende capacita.
Leysner no ta di acuerdo cu e pensamento cu nos hobennan no tin e pasion pa traha cu hende grandi, y cu tecnologia ta prevalece riba haya educacion pa traha cu e gruponan vulnerable.
“Pero mi ta kere cu si tin hoben cu tin pasion pa traha cu hende grandi y si nos cuminza traha riba e parti ey, nos mes a weita cu algun grupo a wordo forma door di e hobennan. Pero no tin un MBO opleiding of estudio pa yuda hende grandi. Esey nos mester cuminza pusha awo, un opleiding MBO mescos cu nos a cuminza cu actividad fisico y movecion. Hende grandi mester di mas atencion, riba e mantelzorg. Nos mester yuda e mantelzorgnan”, segun señor Leysner.
El a subraya cu hopi hende ta traha mantelzorg pero nan mester di apoyo y e fundacion ta pensando pa bin cu un grupo di sosten. Nan ta bay bin cu arte creativo, y diferente actividad den bario. Fundacion Movimento ta Bida ta bay concentra hopi riba e barionan.
Finalmente Rudy Leysner a expresa su gratitud na tur persona cu a coopera cu e fundacion, na un manera directo of indirecto, organizacionnan y clubnan di servicio ya cu nan tur a coopera pa e fundacion bira grandi.
