Fundacion Refugio Social ta ofrece opvang temporal pero e no ta duna guia

Rene Ridderstaat, presidente:

ORANJESTAD (AAN) – Rene Ridderstaat, Presidente di Fundacion Refugio Social, a comenta den un entrevista cu e fundacion aki a lanta pa duna opvang temporal na casonan, principalmente di hende homber. 

E por ta ayudo pa un ciudadano cu no tin un dak riba su cabes, pa un of otro motibo. E no ta un fundacion cu ta bay duna guia pero alohamento temporal so.

El a bisa cu instancianan formal cu ta interesa pa yega na un acuerdo cu e fundacion aki, pa motibo cu nan tin cierto cliente of cu nan tin un persona den necesidad cu nan ta trahando cune, por haci uso di e facilidad aki si nan tin un acuerdo, pagando e suma minimo.

Ridderstaat a menciona cu e directiva ta haci su trabao completamente boluntario, y nan ta zorg pa yuda den e necesidad cu nan ta mira na Aruba, pasobra e ta keda semper cu tin instancianan cu no ta haya oportunidad pa haya un dak temporal, pa cierto situacionnan cu ta presenta. Cerca e fundacion por keda pa un temporada specifico y no ta bira algo cu un persona por keda un of dos aña pero e ta mara na e tempo cu e instancia cu ta interna e persona den e fundacion, ta dune e guia y busca un solucion mas duradero.

Rene Ridderstaat a reitera cu e fundacion ta duna alohamento so, nan no ta duna guia. E persona por opta pa inclui e suma cu ta duna cuminda, of esun di alohamento so, y e instancia cu a trece ta zorg pa dune cuminda, pa e persona por sigui.

Asina e persona por sinti su mes confortable un rato mientras cu e proceso ta duna tempo pasobra no tur ora cu un persona tin un situacion di emergencia, ta facil pa e haya solucion cerca famia, e no por haya un apartamento ni un cas temporal, y esaki ta e parti cu Fundacion Refugio Social por yuda pa e persona haya un dak riba su cabes, pero e tin un comienzo y un final.

El a reitera tambe cu e fundacion por traha cu tur instancia cu cual tin un acuerdo di cooperacion; actualmente, nan ta den dialogo cu diferente instancia pa nan por wak kico ta e posibilidad y pa e fundacion splica kico nan ta ofrece, kico ta e costo pasobra e operacion di e lugar tin su costo pero e ta cubri tur cos inclui. No ta algo pa haci ganashi, pasobra como stichting nan no mag haci esaki, pero pa nan ta importante pa paga tur loke ta utilidad, seguro, si tin cuminda inclui den dje, materialnan, reemplaza cosnan cu por kibra; esaki ta e parti cu esnan encarga tin cu cumpli cune. El a remarca cu no ta un suma exageradamente halto, pero e ta razonable.