*Y lantamento di Tico na Aruba
ORANJESTAD (AAN) – Clifford Rosa, Director di Fundacion Rancho, den entrevista cu Matutino DIARIO, a splica cu e fin di siman aki ta wordo conmemora e di 230 aña di lantamento di Tula, na Corsou y di Tico na Aruba.
Den conexion cu e conmemoracion aki e ta haci un yamada pa acudi na e actividadnan cu ta bay tin, Diasabra y Diadomingo di e siman aki.
El a splica cu esaki ta e situacion cu tabata tin na aña 1795 na Corsou, pero e lantamento aki a sosode di tal forma cu, historicamente, ta wordo mira con informacion a move den e Caribe di un Isla pa otro, y asina ey e lantamento a tuma luga dia 17 di Augustus 1795.
“Tula, di berdad di Corsou, pero tambe nos ta bisa: kico lo a sosode na Aruba? Y na Aruba nos tin e nomber Tico, cu tambe den e mesun periodo a haci lantamento, y su strafe tabata cu nan a mand’e Corsou, cer’e”, Clifford a indica.
Pero e cosnan aki ta informacionnan cu ta bin danki na e atencion cu tin pa e pasado di esclavitud, p’asina tambe nos sa un tiki mas di nos mesun historia. “Akinan nos kier para keto, mirando cu 230 aña pasa e lantamento aki lo mester a influencia e abolicion di esclavitud, cu a sosode hopi aña despues, te na 1863”, el a bisa.
“Pero sigur, nos kier para keto un rato den e contexto cu nos ta bay tin un charla, den diferente aspecto, cu nos ta bay hunto cu Fundacion Museo Tula y Fundacion Rancho. Nos ta bay mustra cu nos kier colabora cu otro den e sentido cu e informacionnan aki mester wordo treci den un sistema educativo. Con nos por educa nos generacionnan, y eigenlijk nos mes mas, tocante di e temanan aki, y tambe cu nos mir’e como informacion historico pa futuro” Clifford Rosa a señala.
CONMEMORACION FIN DI SIMAN:
Fundacion Rancho y Museo Tula, ta bay ta na Archivo Nacional Diasabra 16 pa 10 or di mainta, caminda ta bay inicia un proceso y asina tambe pa 2.30 or di merdia lo cuminza tambe cu un workshop, den Caya, na Residencia Artistico di Aruba. “Y Diadomingo 17, cu ta Dia di Tula, pa 6 or di atardi nos ta haci un encuentro riba Plaza Wilhelmina, cu e intencion di intercambia y pasa informacion.
Ademas lo haci un caminata den forma pasivo p’asina nos yega na Fort Zoutman, cu ta un di e edificionan mas bieu, pasobra asina e ta documenta, cu lo a mira tur cos sosode na Aruba, y sigur si e murayanan aki por a papia lo a bisa hopi cos tambe. Pero lamentablemente, loke tin skirbi aki so nos tin, y nos por bisa ‘ok, akinan a sosode hopi cos”, Clifford Rosa a relata.
