Clifford Rosa di Fundacion Rancho:
ORANJESTAD (AAN): Fundacion Rancho, dialuna 20 di april ta cumpli 16 aña como fundacion. Pa celebra e 16 añanan di existencia, Stichting Rancho a organisa un simposio riba e fecha menciona na Universidad di Aruba. Estrechando laso cu UNA, esaki ta e di dos aña cu nan ta celebra un aña mas di Fundacion Rancho na UNA.
E tema di e simposio lo ta ‘Raiz , Caminda & Futuro’ y a wordo organisa danki na e fondo di Herdenkingscomité Slavernijverleden.
Clifford Rosa di Fundacion Rancho a remarca cu simposio di e aña aki ta importante tambe pasobra lo trata e topico di 15 aña di Fundacion Rancho trahando riba conservacion di herencia y tambe e topico di pasado di sclavitud na Aruba.
Lo tin 6 presentado for di entre otro La Guajira, Europa, kendenan lo duna presentacionnan pa educa, conscientisa y crea conversacionnan tocante nos herencia. E simposio lo tuma luga den Aula di Universidad di Aruba, dialuna 20 di april di 8:30 AM pa 6:00 PM. Registracion ta habri pa publico en general y por haci esaki via nan website.
