Director Clifford Rosa ta splica
ORANJESTAD (AAN) – Stichting Rancho a yama un conferencia di prensa den e centro di actividad di e fundacion, unda cu a elabora tocante e celebracion di e 13 aniversario di e Fundacion mañan dia 20 di April. Ademas, a elabora riba Oranjestad 200 cual celebracion ta entre 20 cu 27 di April 2024.
Clifford Rosa, director di Stichting Rancho, a hiba palabra y a indica cu diahuebs 20 di April awo, ta celebra 13 aña di existencia di Fundacion Rancho, y e ta contento di mira e desaroyo di e fundacion.
E fundacion ta organizando un Simposio diahuebs awo, y tambe lo tin un conversatorio diabierna 21, y un exposicion den aire liber y un expo online pa diasabra 22.
Clifford Rosa a señala cu esakinan ta tres diferente proyecto y e fundacion ta keda wak e fechanan di 20 pa 27 di April awo como e fechanan cu ta importante no solamente pa e celebracion di aniversario 13 di Fundacion Rancho, pero tambe nan ta purba di brinda un programa mas extenso ademas, pa yega na e dia di celebracion di Dia di Rey, pa asina purba yena e actividadnan.
Rosa a papia tambe riba “Oranjestad 200”, mirando cu otro aña, esta 2024, e celebracion ta cuminza na April 20 te 27. E meta ta presenta tayernan, lectura, y diferente enfoke cu tin di haber cu arte, cultura, y tur loke tin di haber cu e Capital Oranjestad.
“Pasobra pa nos, Rancho ta e curazon di Oranjestad, y asina ey nos ta treciendo dilanti pero mirando e realidad tambe cu tur trabao cu mester tin in place, pa renovacion di un area urbano. Pues, teniendo na cuenta cu tur e regulacionnan cu tin, ainda nos ta fomenta e proteccion di e area di Rancho, pero tambe nos ta papiando di e area di Oranjestad cu ta sumamente importante pa papia di proteccion. Pakico? Pasobra e tin di haber cu bo herencia, desaroyo, cultura y tur esey ta locual nos ta bay ta treciendo dilanti”, Rosa a subraya.
El a expresa su gradicimento na Dios pa nan por tin e vision y sabiduria pa por atende cu e Fundacion den e temponan aki, mirando cu no ta e tempo di mas facil, saliendo for di e periodo di pandemia y di otro problema mas cu tin.
