Fundacion Rancho a celebra su di 12 aniversario den hermandad di Aruba cu La Guajira

Clifford Rosa, presidente, sumamente satisfecho:

ORANJESTAD (AAN) – Diaranzon 21 di April, a tuma lugar e celebracion di 12 aña di Fundacion Rancho. Presidente di Fundacion Rancho, Clifford Rosa, a duna di conoce cu ademas di un brindis, a tuma lugar un intercambio cultural y comercial entre Aruba y La Guajira, y esaki ta e prome biaha cu nan ta haya e invitadonan aki, pa asina por inicia e proceso di intercambionan aki.

Diaranzon anochi tabata tin presentacion di diferente tema, atravez di cuater charla cu a duna estimulo pa nan bira mas profesional den nan trabao, cual sigur ta un trabao conhunto (samenwerking).

Clifford Rosa a menciona instancianan manera Universidad di Aruba, SDG Aruba, y docencia di Universidad di La Guajira, ta forma parti di e trabao conhunto aki.

Tambe su persona como presidente di e Fundacion ta duna su aporte pa e desaroyonan cu tin pa celebra e di 200 aña di e Ciudad di Oranjestad.

Un di e invitadonan na e celebracion aki tabata e Alcalde di Uribia, cu ta e Capital Indigena di Colombia, y señor Rosa a sinti su mes honra cu e bishita di un mandatario di tal calibre, y esun di mas halto di La Guajira cu ta situa hopi cerca di Aruba.

Clifford Rosa ta mira esaki como un logro hopi grandi. Tambe den e delegacion cu a acompaña e Alcalde tabata presente su Secretaria di Desaroyo Economico y Medio Ambiente. Ademas tabata presente un docente di Universidad di Aruba, y un artista Wayuu , Dandi Osorio, cu a papia riba e tema di e parti ritual y e parti cultural cu nan ta biba den dje. Tambe a bin un experto den turismo indigena, y pa nan tabata hopi importante pa ser conoci cu Aruba, como isla conoci pa atende cu turismo. Clifford Rosa a conclui bisando cu e siman aki ta un siman di educacion pa Aruba mes y di su hermandad cu La Guajira.