Fundacion PANA ta celebra ‘Sinterklaas Riba Caya’ cu donacion di 500 regalo na mucha rond Aruba

Celebrando nan di 10 aniversario

ORANJESTAD (AAN): Fundacion Pa Amor di Nos Aruba (PANA) a celebra cu gran orguyo e 10 aniversario di su iniciativa comunitario, ‘Sinterklaas Riba Caya,’ un tradicion cu ta simbolisa 10 aña di alegria, generosidad y union den nos comunidad. Bao liderazgo di Paulina Perret-Gentil, y cu sosten y donacion generoso di hopi amigo, e celebracion di e aña aki a trece sonrisa na cara di cientos di mucha na Aruba.

Dia 5 di december, e ekipo di PANA a bishita Colegio Bon Bini y Scol Frere Bonifacius na Oranjestad, caminda nan a reparti regalo na e scolnan manera parti di e celebracion tradicional di Sinterklaas. Despues a sigui dia 6 di december na Club Boneriano na San Nicolas, caminda mucha di diferente scol a reuni pa ricibi nan regalo den un ambiente hopi harmonioso y festivo. Den total, a reparti 500 regalo, continuando cu e compromiso di Fundacion PANA pa duna luz y alegria na nos chikitinnan durante e dianan di fiesta.

E proyecto grandi aki tabata posibel danki na e dedicacion di 50 boluntario, entre esunnan permanente di PANA y miembronan cu hopi entusiasmo di e Interact Club di International School of Aruba. Preparacionnan a cuminsa casi dos luna prome, ora cu PANA a busca sponsor, colecta regalo y prepara tur pa por duna un obsekio special na tur mucha.

Segun ekipo di PANA cu ta consisti, den su mayoria, di residentenan local di descendencia Venezolano; wak e alegria y emocion den cara di e muchanan ta reafirma e berdadero mensahe tras di e iniciativa. ‘Sinterklaas Riba Caya’ ta keda un di e tradicionnan mas gusta di Fundacion PANA, representando compasion, comunidad y e spirito di duna.

Fundacion PANA kier duna un danki hopi grandi na tur hende cu a contribui pa e edicion special di aniversario aki, cu un reconocemento special pa Sheritza Tsu, Janine Rodriguez y Gregory Goodgedrag pa nan apoyo fundamental den organisacion y ehecucion di e evento.

Cu bista pa futuro, PANA ta sigui comprometi cu su mision di sostene y inspira e muchanan di Aruba—cu un sonrisa cada biaha.